ՀՀ Լոռու մարզպետարանի աշխատակազմի զարգացման ծրագրերի եւ վերլուծության բաժնի պետ Հասմիկ Մկրտչյանի կարծիքով՝ ժամանակն է, որ Վանաձորում ստեղծվի տեխնոլոգիական կենտրոն:
Aravot.am-ի հետ հարցազրույցում Հասմիկ Մկրտչյանը նշում է, որ դա ոչ միայն կհամակարգի Վանաձորի ու Լոռու մարզի գիտատեխնիկական ներուժը, այլեւ հնարավորություն կտա զարգանալու ողջ հանրապետությանը:
«Մեզ անհրաժեշտ է ստեղծել տեխնոլոգիական կենտրոն, որովհետեւ ունենք այդ պայմանները` կադրեր, արդյունաբերական քաղաք է, եւ մեզ անհրաժեշտ է, որպեսզի վերապատրաստված, հզոր, լավ մասնագետներ ունենանք, հնարավորություններ ունենանք դուրս գալու միջազգային շուկա»:
Կարդացեք նաև
Նա ասում է, որ եթե սարքաշինության ու մեքենաշինության բնագավառում աշխատանքները սկսվեն, Վանաձորը ունենա տեխնոլոգիական կենտրոն, ապա դա նաեւ հնարավորություն կտա բնագիտական ու տեղեկատվական տեխնոլոգիաների բաժիններում սովորող ուսանողներին ստացած գիտելիքները գործնականում զարգացնելու:
«Ուսանողներն ավարտելուց հետո հնարավորություն կունենան զարգացնելու իրենց գիտելիքները կոնկրետ տեղեկատվական տեխնոլոգիաներում, բացի այդ` ոչ միայն աշխատատեղեր կբացվեն այդ կենտրոնում, այլ նաեւ ունեցած հնարավորությունների եւ բազայի հիմքի վրա մյուս միջազգային ծրագրերն ավելի հեշտ կմտնեն մարզ, իսկ միջազգային կազմակերպության մուտքը մարզ նշանակում է եւ փորձի փոխանակում, եւ աշխատատեղեր, եւ նոր մոտեցումներ»,- բացատրում է Հասմիկ Մկրտչյանը:
Անուշ ԲՈՒԼՂԱԴԱՐՅԱՆ
