Այսօր երեկոյան Գաֆեսճեան արվեստի կենտրոնում տեղի կունենա Հայաստանի մանուկներ հիմնադրամի 3-րդ ամենամյա նվիրատվությունների երեկոն:
Aravot.am-ի հետ զրույցում հիմնադրամի մարկետինգի տնօրեն Հայկ Բոյաջյանը հայտնեց, որ ներկա կլինեն հիմնադրամի աջակից գործարարներն ու ընկերությունները, այդ թվում` Orange Armenia-ն, VivaCell MTS-ը, HSBC բանկը. «Ընդհանուր առմամբ` մոտ 150 հյուր կունենանք: Մշակութային ծրագրի ընթացքում ելույթներով հանդես կգան երգիչ Արթուր Իսպիրյանը եւ դերասան Վարդան Պետրոսյանը, ինչպես նաեւ` Արմավիրի մարզի Լեռնագոգ գյուղի պարախումբը եւ Մյասնիկյան գյուղի երկու երիտասարդ երգիչ: Ներկա կլինի նաեւ ՀՀ-ում ԱՄՆ դեսպանը»:
Պարոն Բոյաջյանը տեղեկացրեց, որ երեկոյի ընթացքում նկարների աճուրդ կկազմակերպվի. կցուցադրվի բելգիացի հայտնի նկարիչներից մեկի կտավը:
Հայկ Բոյաջյանը նաեւ նշեց, որ Հայաստանի մանուկներ հիմնադրամը ծրագրեր է իրականացնում չորս ոլորտի գծով` կրթություն, առողջապահություն, տնտեսական եւ սոցիալական զարգացում. «Վերանորոգում ենք դպրոցները, մանկապարտեզները եւ պոլիկլինիկաները, վերապատրաստում՝ մարզերի ուսուցիչներին եւ բուժքույրերին: Մեր առաքելությունը գյուղական համայքների զարգացումն է, որպեսզի մարզերի երեխաները լավ ապագա ունենան»:
Կարդացեք նաև
Լուիզա ՍՈՒՔԻԱՍՅԱՆ
