ԱԺ ՀՀԿ պատգամավոր Կարինե Աճեմյանի կարծիքով, ընդդիմադիր միասնական հնարավոր թեկնածուն կարող է ՀՀԿ թեկնածուին հավասար մրցակից լինել: « Կարող է հավասար մրցակից լինել, եթե ռեալ է: Բայց ռեալ չեմ համարում, նախադրյալներ չկան: Ընդդիմադիր ուժերն ունեն ամբիցիաներ, ամեն մեկն ուզում է ցույց տալ, որ ինքն ավելի ընդդիմադիր է: Իրենց մեջ հարցեր ու խնդիրներ կան, որոնք չեն կարողանում հաղթահարել, դրա համար էլ չեն կարողանում միասնական թեկնածուով հանդես գալ: Մենք ուզում ենք ընդդիմությունն ուժեղ լինի, ուզում ենք ուժեղ թեկնածու լինի, որովհետեւ մեզ անընդհատ մեղադրում են մենաշնորհի մեջ, իսկ մենք չենք վախենում մրցակցությունից: Թող չբացառեն ՀԱԿ-ԲՀԿ միասնական թեկնածուն, միավորվեն եւ ի հայտ գա այդ թեկնածուն, պատրաստ ենք մրցել»,- այսօր « Հենարան» ակումբում ասուլիսի ժամանակ ասաց տիկին Աճեմյանը: Անդրադառնալով ԱԺ 4 խմբակցությունների նախաձեռնությանը՝ Աժ արտահերթ նիստ հրավիրելու վերաբերյալ, պատգամավորն ասաց իրավունք ունեն իրենց առաջարկը պնդել. «Սպասենք քվորում կլինի , թե՝ ոչ: Այդ նախաձեռնությունը ՀՀԿ-ի կողմից տապալելու հարց չեմ տեսնում»:
Տիկին Աճեմյանը անդրադարձավ նաեւ ԲՀԿ-ի քաղաքական առաջարկին՝ խորհրդարանական կառավարման համակարգի վերաբերյալ եւ չբացառեց, որ եթե քաղաքական ուժերը նախագահական ընտրություններից հետո էլ պնդեն դրա անհրաժեշտությունը, ՀՀԿ-ն հնարավոր է քննարկի. «Կարծում եմ՝ դրա ժամանակը չէ հիմա: Նույնիսկ պատկերացնենք՝ այդ առաջարկությունը կանցնի, միենույնն է խորհրդարանական ընտրութունները 2017-ին են ու այդ համակարգը գործելու է հինգ տարի հետո: Ու ինչպես տեսնում ենք, չգիտես ինչու, միշտ ընտրություններից առաջ են այդ հարցը բարձրացնում. նախագահական ընտրություններից հետո բացառված չէ, որ քննարկենք»:
ՀՀԿ պատգամավորը հայ-թուրքական հարաբերոթյունների, Ղարաբաղյան կոնֆլիկտի կարգավորման հարցում առաջընթացի հեռանկարներ է տեսնում ՀՀ նախագահ Սերժ Սարգսյանի Ֆրանսիա կատարած վերջին այցելությունից հետո. «Այցը շատ կարեւոր էր, նախագահի բոլոր հանդիպումներն իրենց արդյունքը կունենան: Նոր հարաբերություններ են ձեւավորվել, նոր թարմ ձեւաչափեր, որոնք իրենց հետեւանքները կունենան »:
Արփինե ՍԻՄՈՆՅԱՆ
Կարդացեք նաև
