ՖԻԴԵ-ի նախագահ Կիրսան Իլյումժինովը մտորում է Հայաստանին եւ Ադրբեջանին միմյանց դեմ հանել, ճիշտ է՝ շախմատային խաղատախտակի առջեւ:
Խանտի-Մանսիյսկում ընթացող շախմատի կանանց աշխարհի առաջնության պաշտոնական կայքին տված հարցազրույցում նա ասել է, թե կարելի է նաեւ այլ երկրների միջեւ նման մրցամարտեր կազմակերպել, օրինակ, Ուկրաինան՝ ընդդեմ Ռուսաստանի, Ռուսաստանն՝ ընդդեմ ԱՄՆ-ի…
Ըստ մտահղացման, պայքարն ընթանալու է բջջային հեռախոսներով: Յուրաքանչյուր կողմ կենդանի ժամանակում քայլի համար մի քանի րոպե կունենա, իսկ հաշվիչ համակարգը կընտրի քայլի այն տարբերակը, որն ավելի հաճախ է կրկնվել: Իլյումժինովը համոզված է, որ այդպես կորոշվի նաեւ տվյալ ազգի միջին IQ-ն, իսկ դա երկրի նախագահների համար շախմատը դպրոցական ծրագիր ընդգրկելու խթան կհանդիսանա: ՖԻԴԵ-ի նախագահը արել է նաեւ հետեւյալ հետաքրքիր հայտարարությունը. «Երբ ես այս նախագիծը քննարկում եմ երկրների նախագահների հետ, նրանք մի տեսակ վախենում են: Առաջարկեցի Հայաստանի եւ Ադրբեջանի նախագահներին՝ նման մրցամարտ կազմակերպել իրենց երկրների միջեւ: Եվ նախագահներից մեկն ասաց. «Իսկ եթե պարտվենք, դա կնշանակի, թե մենք նրանցից հիմա՞ր ենք»:
Աշոտ ՀԱԿՈԲՅԱՆ
