Նոյեմբերի 15-ին կայացել է Տավուշի մարզխորհրդի նիստ: Նախկինում Տավուշի մարզպետարանի ինտերնետային կայքը նախապես ծանուցում էր մարզխորհրդի նիստերի վերաբերյալ, լրագրողները մասնակցում, լուսաբանում էին դրանք: Սակայն այդ նիստի մասին ծանուցում չկար: Մարզի լրագրողները տեղյակ չեն եղել, որ մարզխորհրդի նիստ է կայանալու, մարզպետարանի լրատվության եւ հասարակության հետ կապերի բաժինը չի հրավիրել նրանց: Մարզխորհրդի նիստերում մարզպետ Արմեն Ղուլարյանը երբեմն վիրավորում է մարզխորհրդի անդամներին, մենք նախկինում այդ մասին իրազեկել ենք: Հավաբանար դա է պատճառը, որ մարզխորհրդի նիստի մասին նախապես չեն հայտարարել: Նոյեմբերի 16-ին մարզպետարանի կայքում տեղեկատվություն է զետեղվել նախօրեին տեղի ունեցած նիստի վերաբերյալ; Ի թիվ այլ հարցերի քննարկվել են նոյեմբերի 1-ի դրությամբ մարզի համայնքների սեփական եկամուտների հավաքագրման ցուցանիշները: Ընթացիկ տարվա 10 ամիսներին մարզի 62 համայնքների սեփական եկամուտների հավաքագրումը կազմել է 369.1 մլն դրամ, որը կազմում է նախատեսվածի 75.8 տոկոսը:
Ոսկան ՍԱՐԳՍՅԱՆ
