Այսօր Գյումրու ժուռնալիստների «Ասպարեզ» ակումբում Շիրակի մարզի ազատամարտի վետերանների միության կանանց խորհրդի 4 անդամներ մամուլի ասուլիս էին հրավիրել` հատ-հատ բնութագրելով պաշտոնյա գեներալների վերաբերմունքը զոհված ազատամարտիկների ու զինծառայողների ընտանիքների նկատմամբ: Կանանց վրդովեցրել է այն, որ թեև իրենց ամուսինները ինքնակամ պատերազմ մեկնեցին` հանուն հայրենիքի զոհելով կյանքը, որդիներին էլ ողջ-առողջ բանակ ճանապարհեցին, փոխարենը նրանց դիակները հետ բերեցին, սակայն այսօր ՊՆ իրենց սիրաշահելու փոխարեն վիրավորում ու ծաղրում է:
Բանախոսների դժգոհելով, այս գերատեսչությունում անգամ հարկ չեն համարում ուսումնասիրել ու պատասխանել բնակարանային բարելավման մասին ուղղված իրենց դիմումներին: Ըստ տիկնանց, իրենք հաշվառված են ՊՆ բնակարանային բարելավումների ցուցակում` կառավարության 947 որոշման համաձայն, սակայն չլչլում են ` խորհուրդ տալով սպասել, մինչև որ կլուծվի Գյումրու բոլոր անօթևանների հարցերը:Մինչդեռ, նրանց ներկայացմամբ, իրենք ապրում են կարիքի մեջ, ուրիշների տանը, ու հեռու չէ փողոցներում հայտվելու վտանգը: «Գուցե կառավարությունը գումար հատկացնում է մեր բնակարանային հարցերի բարելավման համար, սակայն ՊՆ-ն` Սեյրան Օհանյանի գլխավորությամբ այլ հարցեր է լուծում, ավելի կարևոր ծախսերի մեջ է. ջիփերն է շատացնում», -հեգնում էին բանախոսները:
Տիկնանց ասելով, իրենք հանդիպել են Սեյրան Օհանյանի հետ, սակայն վերջինս հարցի լուծումը դրել է սոցվարչության պետի ուսերին , որն էլ ոչինչ չի անում: «Բոլորին նույն շաբլոն, համակարգչով ծրագրավորված պատասխանն են գրում`սպասեք ձեր հերթը կհասնի, կստանաք, ահա ամբողջ պատասխանը»,-դժգոհեց սպանված զինվորի մայր Անահիտ Առաքելյանը:Նրանք դժգոհեցին նաև գեներալ Մանվելից, ով ոչինչ չի արել իրենց համար: «Նրա պատգամավոր դառնալը մեզ ի՞նչ»,- ասացին կայանք: Զոհված ազատամարտիկներից մեկի այրին էլ ` Քնարիկ Հակոբյանը պատմեց, որ ինքը մի անգամ գնացել է Երևան ` հանդիպելու գեներալ Մանվելին, նրան հերթագրել են, իսկ ժամադրման օրը, երբ Գյումրիից կրկին անգամ մեկնել է Երևան` այն էլ շատ ուշ ժամի, «Սպայի տանը» պատասխանել են, որ գեներալ Մանվելը չի կարող ընդունել, քանի որ տեղում չէ: «Չգիտեի ինչո՞վ պիտի վերադառնայի Գյումրի էդ ուշ ժամին , մթին, ապրի վարորդի արևը, ով ընդառաջեց , չնայած պասաժիրներ չկային, բայց ինձ հետ բերեց», պատմեց Քնարիկ Հակոբյանը:Միակ գեներալը, որից անչափ զգացված են տիկնայք, Շիրակի մարզպետ Աշոտ Գիզիրյանն է: Նրանց բնութագրելով, գեներալ Գիզիրյանը այնքան նրբանակտ է գտնվել, որ հերթեր չգոյացնելու ու այս ձևով կանանց չնսեմացնելու համար, իր օգնությունը զոհվածների տներն է ուղարկել: Կանանց մեծ մասը, բացառությամբ մեկի, գոհ էր նաև Վարդան Ղուկասյանից, ով կտրոններ է տվել Գյումրու մեջ անվճար երթևեկման, սակայն այստեղ էլ քթից են բերել վարորդները: Տիկնայք ապշած ու զայրացած են նաև այն փաստից, որ օգնություն հատկացնելիս զոհված զինվորների հարազատներին ևս բաժանում են գյումրեցիների ու երևանցիների:
Մանրամասները` վաղվա տպագիր «Առավոտ»-ում:
Կարդացեք նաև
Նունե ԱՐԵՎՇԱՏՅԱՆ
