PanArmenian Photo
Այսօր մամուլի ասուլիսում ՀԱԿ խմբակցության պատգամավոր Լեւոն Զուրաբյանը հայտարարեց, որ խմբակցությունը ստորագրահավաք է նախաձեռնում` չորեքշաբթի օրը խորհրդարանի արտահերթ նիստ հրավիրելու համար: Այն վերաբերվելու է խորհրդարանում շրջանառության մեջ դրված ՀԱԿ-ի՝ ՀՀ ընտրական օրենսդրությունում փոփոխություններ կատարելու առաջարկներին:
Ժամը 17. 00-ի դրությամբ արդեն առկա էին անհրաժեշտ քանակի ստորագրություններ, որպեսզի արտահերթ նիստ հրավիրվի: Aravot.am-ի հետ զրույցում ԲՀԿ խորհրդարանական խմբակցության քարտուղար Նաիրա Զոհրաբյանը ԲՀԿ-ի` ՀԱԿ-ի նախաձեռնությանը միանալու քայլը բացատրեց նրանով, որ դրանցում ներառված էին ԲՀԿ-ի համար ընդունելի դրույթներ` անցումը 100 տոկոսանոց համամասնական ընտրակարգին, ընտրացուցակների հրապարակում, ծրարների հաշվառում եւ այլն: Տիկին Զոհրաբյանը նույնպես այն կարծիքին է, որ ՀԱԿ-ի առաջարկները հնարավորություն կտան առավել թափանցիկ կազմակերպել ընտրական գործընթացները: Եվ, քանի որ խորհրդարանի կանոնակարգով սահմանված կարգի համաձայն, այդ առաջարկների քննարկումը նախատեսվում էր եկող տարի` նախագահական ընտրություններից հետո, ՀԱԿ-ի արտահերթ նիստ հրավիրելու նախաձեռնությանը չմիանալու պատճառներ ԲՀԿ-ում չեն տեսել:
«Նախաձեռնությանը միացել են մեր խմբակցություն բոլոր պատգամավորները` մեկ-երկու բացառությամբ: Այս պահին արտահերթ նիստ հրավիրելու համար անհրաժեշտ 48 ստորագրությունն արդեն առկա է. դրանք ՀԱԿ, ԲՀԿ, ՀՅԴ եւ «Ազատ դեմոկրատների» պատգամավորների ստորագրություններն են»: Արձանագրությունն այդ տարբերակով կհանձնվի քարտուղարություն, թե այլ պատգամավորներ էլ կմիանան` տիկին Զոհրաբյանը դժվարանում է կանխագուշակել:
Aravot.am-ի հարցին` «Ժառանգության» պատգամավորները չե՞ն արձագանքել, Նաիրա Զոհրաբյանն ասաց, որ ինքը տեղյակ չէ, դրանով ՀԱԿ-ն է զբաղվում, բայց արտահերթ նիստ հրավիրելու համար անհրաժեշտ ստորագրություններն արդեն առկա են. «Մնացած պատգամավորներն իրենք պետք է որոշեն»:
Կարդացեք նաև
Նելլի ԳՐԻԳՈՐՅԱՆ
