«Տարիների ընթացքում մի շարք խնդիրներ են կուտակվել,որոնց լուծումը մինչ այսօր կառավարությունը չի տալիս: Խնդիրները ստիպում են հայ ուսանողին լքել եւ հեռանալ իր հայրենիքից եւ վաղվա ապագան փնտրել օտարության մեջ: Բուհերը պետք է լինեն ապաքաղաքականացված, ոչ թե հանրապետական: Բարձրացված հարցին պետք է լուծում տալ, եթե չլուծեն, մենք պայքարելու ենք մինչեւ վերջ»,-այսօր Aravot.am-ի հետ զրույցում նշեց ՀՅԴ «Նիկոլ Աղբալյան» ուսանողական միության Կենտրոնական վարչության ատենապետ Գերասիմ Վարդանյանը:
ՀՅԴ «Նիկոլ Աղբալյան» ուսանողական միությունը ուսման վարձավճարների, կրթաթոշակների, ուսանողական ճաշարանների, տրանսպորտային զեղչերի և այլ հարցերի հետ կապված այսօր անցկացրեց բողոքի երթ, որի մասնակից շուրջ 400 երիտասարդ ուսանողները կառավարությանը` մասնավորապես ՀՀ վարչապետ Տիգրան Սարգսյանին հանձնեցին իրենց պահանջներն ամփոփող ուղերձ և առաջարկների փաթեթ:
Վերոնշյալ բողոքի միջոցառմանը առաջ քաշվեցին հետևյալ պահանջները.
1. Ուսանողների համար մետրոպոլիտենում ներդնել զեղչով մշտական տոմսերի համակարգ:
Կարդացեք նաև
2. Մարզպետների վրա դնել տվյալ մարզի ուսանողների հաշվառման և տրանսպորտային փոխադրման կազմակերպման պարտականություն:
3. Բուհերի գործառույթների մեջ ներառել ուսանողական ճաշարանների ստեղծում՝ շահույթ չհետապնդող կազմակերպությունների կարգավիճակով:
4. Ուսման վարձի չափը պայմանավորել երկրում առկա որոշակի ցուցանիշներով: Ուսման վճարի չափը պետք է համադրելի լինի պետական պատվերի շրջանակներում տվյալ մասնագիտության գծով պետության կողմից ուսանողի համար կատարվող ծախսերին:
5. Ձևավորել ուսանողական նվազագույն զամբյուղ, որին համապատասխան սահմանել կրթաթոշակ և հետագայում ինդեքսավորել այն:
6. Ուսումնադասախոսական կազմին ներառել կառավարության ներդրած սոցիալական փաթեթում:
7. Ստեղծել հավասար պայմաններ ուսանողների քաղաքական գործունեության համար:
Հյուսիսային համալսարանի ուսանող Արմեն Մելքոնյանը մեզ հետ զրույցում ասաց, որ կրթաթոշակները շատ ցածր են եւ չեն բավարարում անգամ ուսանողի մինիմալ պահանջները լուծելու համար.
«Նշված 7 կետերը բավարարելը գերագույն նպատակն է մեր բողոքի: Ուսանողի սոցիալ-տնտեսական վիճակն այնպիսին չէ, որ վարձ վճարվի, հետեւաբար ցանկալի կլիներ, որ կրճատումների եւ զեղչերի միջոցով գոնե քիչ վճարվեր»:
Անժելա ՇԱՀՈՒՄՅԱՆ
