Երեկ՝ նոյեմբերի 14-ին, թռիչքի էին պատրաստվում բոլոր նրանք, ովքեր եկել էին Հ. Թումանյանի անվան Երևանի պետական տիկնիկային թատրոն՝ ներկա գտնվելու «Պատրաստվիր թռիչքի» ներկայացմանը, որտեղ մասնակցում էին «Հույսի կամուրջ» հասարակական կազմակերպության թատերախմբի երեխաները:
«Թատերախումբը գործում է գրեթե 15 տարի, նրա նպատակն է հանրության ուշադրությունը հրավիրել հաշմանդամություն ունեցող երեխաների հիմնահարցերին և փոխել նրանց վերաբերմունքը հաշմանդամություն ունեցող երեխաների կարողությունների նկատմամբ», – ասաց «Հույսի կամուրջ» ՀԿ-ի հաշմանդամ մարդկանց շահերի պաշտպանության պատասխանատու Զառա Բաթոյանը: Նա նշեց նաև, որ «Պատրաստվիր թռիչքի» ներկայացմամբ սկիզբ է դրվում հաշմանդամություն ունեցող անձանց իրավունքների պաշտպանության միամսյակի միջոցառումներին, որոնք կիրականացվեն մինչև դեկտեմբերի 15-ը:
Ներկայացման մեջ խաղում էին հաշմանդամ և ոչ հաշմանդամ երեխաներ, թատերախմբի ղեկավար Հասմիկ Խաչերյանի խոսքով՝ նպատակը հաշմանդամություն ունեցող երեխաների ինտեգրումն է: «Այսպիսի ներկայացումներ հաճախ են բեմադրվում, և բուռն արձագանք են ստանում, հաճախ մարդիկ ասում են՝ գալիս էինք այլ բան տեսնելու համար ու հեռանում ենք բոլորովին այլ զգացողություններով», – նշեց թատերախմբի ղեկավարը:
«Ինձ համար դժվար էր կողմնորոշվել, թե ինչի մասին պետք է գրեմ, որովհետև անպայման պետք է շփվես երեխաների հետ, որ կարողանաս ճիշտ թեմա ընտրել, – ասաց պիեսի հեղինակ Մարինե Քոչարյանը, – հենց երեխաներն ինձ օգնեցին՝ ներկայացնելով իրական պատմություններ, որոնց հիման վրա էլ ստեղծվեց մի շատ հետաքրքիր պիես՝ պատանիների կյանքից»:
Ներկայացման բեմադրիչ Արմեն Բարսեղյանն էլ խոսելով ներկայացման փորձերից՝ ասաց, որ երեխաները պրոֆեսիոնալ չեն, և նա ստիպված է եղել փորձերի առաջին իսկ օրվանից նրանց սովորեցնել դերասանական արվեստի այբուբենը, նրանք էլ հաճույքով յուրացրել են: Նա նշեց նաև, պետք է ընդունել հաշմանդամներին որպես հասարակության լիարժեք անդամ, քանի որ նրանք էլ ունեն երևակայություն, երազանքներ, մտքի թռիչք, ցանկություններ, և ինչպես յուրաքանչյուր մարդ, նրանք էլ են իրենց երազներում, մտքերի մեջ պատրաստվում թռիչքների:
Ներկայացման ավարտին ծափահարությունները չէին դադարում, հանդիսատեսի ժպիտն աննկատ չէր կարող մնալ, իսկ դա փաստում էր այն մասին, որ թռիչքն իսկապես հաջողված էր:
Տիգրանուհի Թասլակյան
