Այսօր ՀԱԿ համակարգող Լեւոն Զուրաբյանը հրավիրած ասուլիսում հայտարարեց, որ 4 խմբակցություններով կազմակերպում են ստորագրահավաք՝ ԱԺ արտահերթ նիստ հրավիրելու, որպեսզի քննարկվեն մի շարք օրինագծեր՝ նախագահական ընտրություններին ընդառաջ. «Դժվար է կանխատեսել, որ այս իշխանությունները պատրաստ են գնալ մաքուր, օրինական ընտրությունների: Մենք ներկայացնում ենք օրինագիծ՝ բնակչության պետռեգիստրի մասին, ընտրական օրենսգրքում եւ քրեական օրենսգրքում փոփոխություններ կատարելու»: Դա, ըստ Լեւոն Զուրաբյանի, անում են՝ ընտրացուցակների կեղծման դեմն առնելու համար, կարուսելները բացառելու համար: Փորձելու են տեսախցիկներ տեղադրել, ընտրացուցակների մենեջմենթը փոխել. «Մենք առաջարկելու ենք, որ ընտրողների ռեգիստրում ընդգրկվեն միայն մարդիկ, որոնք գտնվելու են Հայաստանում: Նրանք, որոնք բացակայում են Հայաստանից 6 ամսից ավելի, պետք է դուրս գան ընտրացուցակներից: Դրել ենք շրջանառության մեջ մեր առաջարկած փաթեթը, բայց եթե սպասենք ընթացակարգին, այդ փոփոխությունները հնարավոր չի անել մինչեւ նախագահական ընտրությունները: Խորհրդակցելով 4 խմբակցությունների հետ, ցանկանում ենք նոյեմբերի 21 –ին, ժամը 12-ին արտահերթ նիստ հրավիրել եւ քննարկել այդ փաթեթը»: Անհրաժեշտ է հավաքել 44 ստորագրություն, 24 ժամվա ընթացքում: Այսօր ժամը 11.15 -ին քարտուղարությունից խմբակցությունները արդեն վերցրել են համապատասխան ձեւաթուղթը եւ ունեն 35 պատգամավորի ստորագրություն: Լեւոն Զուրաբյանը նշեց, որ իրենք առանձնապես «պատրանքներ, իլյուզիաներ չունեն. «Իմանալով ՀՀԿ-ի ոճը, զոռբայությունը, վստահ ենք, որ անգամ եթե հաջողվի 44 ստորագրությունը, հրավիրենք նստաշրջան, ամեն ինչ անելու են, այն տապալելու համար: : Դրանով իրենք ցույց կտան Հանրապետականի դեմքը»: Պարոն Զուրաբյանը նաեւ նշեց, որ ԲՀԿ-ն լրիվ ընդունում է առաջարկը, Դաշնակցությունը՝ որոշակի վերապահումներով, իսկ «Ժառանգություն» ֆրակցիայից ստորագրել են «Ազատ դեմոկրատները»՝ Խաչատուր Քոքոբելյանը եւ Ալեքսանդր Արզումանյանը, վերջնական պատասխան չունեն:
Հռիփսիմե ՋԵԲԵՋՅԱՆ
