Ինչպես եւ նախորդ դեպքերում, այս անգամ եւս, Հեռուստամարաթոն 2012-ի տեսահոլովակը նկարահանել է «Շարմ» ընկերությունը։ Այս տարվա տեսահոլովակի համար հիմնադրամը վճարել է 17 հազար դոլար։ Ընդ որում, խնդիրը ավելի շատ ոչ այնքան գումարն է, որովհետեւ օրինակ՝ 2009 թվականի հոլովակի համար հիմնադրամը 25 հազար դոլար էր վճարել, այլ
այն, որ հիմնադրամի համար տեսահոլովակ նկարահանելը դարձել է «Շարմի» մենաշնորհը:
Հիմնական պաշտոնական մեկնաբանությունները, որ հնչում են այս կապակցությամբ, այն է լինում, թե ««Շարմի» արած աշխատանքից մենք
գոհ ենք»։ Այնինչ, պարզ չէ, թե ինչո՞ւ տեսահոլովակ նկարահանելու համար մրցույթ չի հայտարարվում, գուցե ինչ-որ մեկը կրկնակի էժան, կամ հասարակական հիմունքներով, ավելի կրեատիվ տեսահոլովակ կնկարահանի։ Առավելեւս, որ այդ ընկերության բոլոր հոլովակները որեւէ ձեւով չեն առանձնանում, միանման են ու կանխատեսելի։
Կարդացեք նաև
«Թումո» կենտրոնի երեխաներն օրինակ՝ որոշ ժամանակ հատկացնելով եւ անցկացնելով համակարգիչների մոտ՝ Սերժ Թանկյանի երգերից մեկի համար ստեղծեցին «Շարմից» ոչ պակաս կրեատիվ (եթե ոչ ավել) հոլովակ, որը հետո Թանկյանն օգտագործեց որպես պաշտոնական հոլովակ։ Թե չէ, տպավորություն է ստեղծվում, որ հիմնադրամը խնդիր է դրել ամեն տարի տեսահոլովակ պատվիրի «Շարմին», միայն «Շարմին» եւ ոչ մեկին՝ բացի «Շարմից» ։
Քրիստինե ԽԱՆՈՒՄՅԱՆ
«Չորրորդ իշխանություն»
