Հատված Հանրապետական կուսակցության փոխնախագահ, պատգամավոր ՌԱԶՄԻԿ ԶՈՀՐԱԲՅԱՆԻ հետ հարցազրույցից
–ԲՀԿ–ի նախաձեռնած կոնսուլտացիաները կարո՞ղ են արդյունավետ լինել:
-Նախագահի թեկնածուներ առաջադրելուն մեկ ամսից պակաս ժամանակ է մնացել, բայց մեր հավանական մրցակից քաղաքական ուժերը նոր միայն կոնսուլտացիաներ են ձեռնարկում: Գրեթե մեկ շաբաթ առաջ այս գործընթացը մեկնարկել է, որոշ հանդիպումներ կայացել են, բայց արդյունքների մասին ոչ ոք դեռ ոչինչ չի հայտնել: Տպավորություն է առաջանում, որ կոնսուլտացիաների ժամանակ կարեւորը ոչ թե օրակարգն է, այլ միասնական ճակատ ստեղծելու եւ քաղաքական մեծամասնության թեկնածու Սերժ Սարգսյանին հակադրվելու նպատակը:
–Կառավարման խորհրդարանական համակարգին անցնելու գաղափարը կարո՞ղ է դառնալ մեկ թեկնածուի շուրջ համախմբվելու առանցք:
-Ծանոթ լինելով մեր քաղաքական ընդդիմախոսների գործելաոճին, չեմ կարծում, թե նրանք կարող են համախմբվել ու միասնական թեկնածու առաջադրել: Նախագահի կամ խորհրդարանական հանրապետության դեպքում վարչապետի պաշտոնում սեփական թեկնածուին տեսնելու հավակնությունները թույլ չեն տալու, որ այս ուժերի միջեւ միասնություն կայանա:
Ոչ իշխանական բոլոր ուժերի միասնական նպատակը իշխանության գալն է: Այս նպատակին հասնելու համար նրանք դիմում են ցանկացած միջոցի: Այսօր համագործակցելու փորձ են անում այն ուժերը, որոնց միավորումը երեկ անհնարին էր համարվում: Նրանք անգամ առաջադրում են խորհրդարանական հանրապետության անցնելու «միավորող» գաղափարը` առանց մտածելու պետության անվտանգության մասին:
Մինչդեռ տրամաբանական է, որ պատերազմական վիճակում եւ պայթյունավտանգ տարածաշրջանում ապրող մեր պետությանը ուժեղ նախագահական կառավարում եւ կամային առաջնորդ է անհրաժեշտ: Մեր շուրջը տեղի ունեցող զարգացումների պարագայում պարտավոր ենք ունենալ անհրաժեշտ փորձ ունեցող գերագույն գլխավոր հրամանատար, ոչ թե խորհրդարանական կառավարում, երբ որոշումները շատ դանդաղ են կայացվում:
Ոչ ոք չի ժխտում խորհրդարանական կառավարման անցնելու հեռանկարը, ինչի հնարավորությունը հիմա էլ մեր սահմանադրությունը տալիս է: Բայց դրա համար նախ կայուն խաղաղություն է անհրաժեշտ։
Եթե որոշ ուժերի թիկունքում չլինեին օտար խորհրդատուներ, այս գաղափարը կարելի էր հանգամանորեն քննարկել եւ բացահայտել լավ ու վատ կողմերը: Չեմ բացառում, որ այս գաղափարը Թուրքիայից է զարտուղի ճանապարհներով թափանցել մեր երկիր, իսկ նպատակը հայտնի է՝ Հայաստանը հնարավորինս թուլացնելն ու վերացնելն է: Հիմա խորհրդարանական համակարգին կողմ է արտահայտվում նույնիսկ այն ուժը, որը երբ իշխանություն էր՝ վերացրեց այն ու հաստատեց նախագահական համակարգ:
Չեմ կարծում, թե սա այն հրաշք-գաղափարն է, որով մեր մրցակիցները կարող են միավորվել ու այլընտրանք ձեւավորել գործող նախագահին:
Գեւորգ ՀԱՐՈՒԹՅՈՒՆՅԱՆ
Կարդացեք նաև
«Հայոց աշխարհ»
