«Մենք նոր ենք փոփոխել մեր ԸՕ-ն եւ կարծում եմ, որ նախագահական ընտրություններից հետո մենք հնարավորություն կունենանք կառավարման համակարգի արդյունավետության վերաբերյալ քաղաքական բանավեճ ունենալ ԱԺ-ում եւ լսել տարբեր տեսակետներ, բայց ընտրություններից մի քանի ամիս առաջ անդրադառնալ այդ խնդրին, այնքան էլ ճիշտ չէ եւ մեր օրակարգում դա այնքան էլ առաջնահերթ հարց չէ»,- այսօր ԱԺ-կառավարություն հարցուպատասխանից հետո լրագրողների հետ ճեպազրույցում անրադառնալով հայաստանյան քաղաքական դաշտում վերջին շրջանում ԲՀԿ-ի կողմից շրջանառվող խորհրդարանական համակարգի անցում կատարելու առաջարկին` ասաց ՀՀ վարչապետ Տիգրան Սարգսյանը:
Ինչ վերաբերվում է հարյուր տոկոսանոց համամասնական ընտրակարգին անցնելու հարցի շուրջ ընթացող բանավեճին, Տիգրան Սարգսյանն ասաց. «Գոյություն ունի քաղաքական տեսական բանավեճ, թե որ ընտրական համակարգն է առավել արդյունավետ: Տարբեր երկրների փորձը տարբեր արդյունքներ է ցույց տալիս եւ ելնելով իր առանձնահատկություններից, տարբեր երկրներ պետք է ընտրեն իրենց համար առավել արդյունավետ համակարգը»:
Նելլի ԳՐԻԳՈՐՅԱՆ
