Վ. Բրյուսովի անվան լեզվաբանական համալսարանում այսօր տեղի ունեցավ Հայաստանում Լեհաստանի Հանրապետության դեսպանության հետ համատեղ կազմակերպած «Չկան երեխաներ, կան մարդիկ. Յանուշ Կորչակը և իր ժառանգությունը» թեմայով սեմինարը` նվիրված Հայաստանում երեխաների իրավունքների պաշտպանությանը:
Բացման խոսքով հանդես եկած լեզվաբանական համալսարանի ռեկտոր Գայանե Գասպարյանը հայտնեց, որ սեմինարը նվիրված է լեհ ականավոր գիտնական, մտածող եւ բժիշկ Յանուշ Կորչակի հիշատակին. «Երբ սեմինարի կազմակերպիչներն ինձ հարցրին, թե կարող է համալսարանն ընդունել այս սեմինարը, պատասխանեցի` իսկ ուրիշ ո՞վ: Լեհերենը դասավանդվում է համալսարանում, բացի այդ` մենք ունենք լեհերենի եւ լեհական մշակույթի կենտրոն, եւ ամենակարեւորը` համալսարանը շարունակում է մանկավարժներ պատրաստելու առաքելությունը»:
Խոսելով Կորչակից` տիկին Գասպարյանն ասաց, որ անհրաժեշտ է հիշել այն սկզբունքները, որոնցով լեհ մանկավարժն ապրում եւ գործում էր. «Կորչակն ասում էր, որ ուսանողների մեջ պետք է սերմանել ինքնակառավարման եւ ինքնաբացահայտման հատկությունները: Այս սկզբունքն ընկած է Բոլոնիայի գործընթացի հիմքում: Կորչակի համոզմունքներն այսօր էլ կիրառելի են»:
Կարդացեք նաև
ԵՊԼՀ ռեկտորի խոսքով. «Սեմինարի խորագիրը պատահաբար չէ ընտրված: Կորչակը երեխաներին չի դիտել որպես «փոքրերի», այլ նրանց վերաբերվել է որպես մարդ»:
Հայաստանում Լեհաստանի Հանրապետության դեսպան Զդիսլավ Ռաչինսկին փաստեց, որ Կորչակը ժամանակակից մանկավարժության սիմվոլն է. «Նա ասում էր, որ կյանքի հիմնական սուբյեկտը մարդն է, եւ ոչ ընտանիքը կամ համայնքը: Մեզանից յուրաքանչյուրը` անկախ սեռից եւ տարիքից, կյանքի ամենամեծ արժեքն է կրում: Կարծում եմ, որ սեմինարն ուսանողներին օգտակար կլինի ոչ միայն մանկավարժական գործունեության մեջ, այլեւ` եվրոպական մտածելակերպի էությունը հասկանալու գործում»:
Լուիզա ՍՈՒՔԻԱՍՅԱՆ
