Այս պահին մոտ 260 հիվանդ, որոնց կյանքը, կարելի է ասել, մազից է կախված, ուռուցքաբանության ազգային կենտրոնում սպասում են, թե կլինի՞ արդյոք լրացուցիչ պետական ֆինանսավորում, որպեսզի ուռուցքով հիվանդները կարողանան իրենց քիմիոթերապիան ստանալ. կլինիկային տրամադրված այս տարվա 800 միլիոն դրամը սպառվել է: Այսօր «Հենարան» ակումբում ասաց ուռուցքաբանության ազգային կենտրոնի մանկական ուռուցքաբանության բաժանմունքի ղեկավար Գրիգոր Բադալյանը:
Նրա խոսքերով, կենտրոնն այս շաբաթ այլեւս նոր հիվանդների չի ընդունում չֆինանսավորվելու պատճառով, բացառությամբ`մանկական չարորակ ուռուցքային հիվանդների, նրանց կլինիկան իր բյուջեի հաշվին է բուժում. «Մեծահասակները գալիս են ասում են` քիմիայի մեր հերթը հասել է, ասում ենք` այո, բայց առայժմ չենք կարող տալ, գումարը վերջացել է, դեղորայք չկա: Հիվանդը հարցնում է` բա կիսատ թողնելը, ուշացնելը վնաս չի՞, ասում ենք`վնաս է: Ես զարմանում եմ, ո՞նց է` հիվանդները մեր գլուխը չեն ջարդում: Բայց երեւի մեզ ճանաչելով, հարգելով…»
Ըստ պարոն Բադալյանի` «Ներկա պահին 2 տարեկան բարորակ ուռուցքով երեխայի չենք ընդունել, դեռ սպասում ենք»:
Կարդացեք նաև
Բժշկի խոսքերով, նույնիսկ վճարունակ հիվանդներին չեն կարող ընդունել. դա օրենքի խախտում կլինի. «Քանի որ իրենք պետք է պետպատվերի գումարը ստանան մեր հիվանդանոցում, հետո նոր հիվանդը կարողանա իր մասնաբաժինը վճարել»: Այսինքն հոկտեմբերի 1-ից, համավճարի ներդրումից հետո, բուժման մի մասը վճարում է պետությունը, մյուս մասն էլ` հիվանդը: Մասնագետի խոսքերով. «Եթե կա չարորակ ուռուցքի ախտորոշում, արդեն տարածվում է համավճարը, պետությունը 118 հազար դրամ փոխանցում է ամեն հիվանդի համար, գումարած դեղորայքի 30 հազար դրամը, սոցանապահովներին`60 հազար, քիմիոպրեպարատների համար»: Եվ եթե նշված գումարը գերազանցում է, ապա հիվանդն իր հաշվին պետք է բուժման ծախսերը հոգա: Շատ դեպքերում գերազանցում է այդ գումարը, եւ ինչպես բժիշկն ասաց` բազմաթիվ ընտանիքներ, եթե կարողանում են գոնե վիրահատության դեպքում մասնակցել համավճարին, ապա քիմիոթերապիայի կուրսի վճարումը չեն կարողանում անել, դա ծանր բեռ է:
«Նվիրիր կյանք» բարեգործական հիմնադրամը ինչ-որ չափով կարողանում է հիվանդների ծախսերը հոգալ, եթե ծնողը դիմում է, եւ կլինիկան տրամադրում է կտրոն, ապա հիմնադրամը հատուցում է գումարը, բայց դա էլ հարցի վերջնական լուծում չէ: Պարոն Բադալյանի ներկայացմամբ` հիվանդները կարող են սպասել ամենաշատը 1 շաբաթ, բայց ոչ` 2, այդ բոլոր հիվանդները սպասում են, թե ինչ կորոշի կառավարությունը:
Նելլի ԲԱԲԱՅԱՆ
