Ռոբերտ Քոչարյանի այս հայտարարությունը ամենայն հավանականությամբ միտված էր արձանագրելու, որ կառավարման համակարգերի վերաբերյալ մոտեցումներով ինքն ամենևին էլ չի տեղավորվում ներկայիս քաղաքական օրակարգի շրջանակում և, առավել ևս, կանգնած չէ դրա հետևում:
ԲՀԿ-ի հայտնի հայտարարությունից հետո որոշ լրատվական և քաղաքական շրջանակներ սկսեցին այս ամենում ինտենսիվորեն Ռոբերտ Քոչարյանին փնտրել։ Նման կասկածների կամ համոզմունքների տարածման մեջ ծպտյալ և հրապարակային առաջամարտիկը ՀՀԿ-ն էր, ինչը կուսակցության կողմից տակտիկական քայլ է՝ միտված վիժեցնելու քաղաքական ուժերի կոնսոլիդացիայի գործընթացը։
Գաղտնիք չէ, որ ԲՀԿ-ի հետ համագործակցության փորձ անող կամ արդեն համագործակցող ՀԱԿ-ում միանշանակ չէ վերաբերմունքը Ռոբերտ Քոչարյանի հանդեպ։ Եվ որքան հասարակության մեջ խորանան կասկածները, որ ներկայիս քաղաքական օրակարգի ձեռագիրը Քոչարյանինն է, այդքան Կոնգրեսի համար դժվար կլինի համագործակցության եզրեր գտնել ԲՀԿ-ի հետ։
Նույնը կարելի է ասել «Ժառանգության» առումով։ Եթե հանրությունը հանրապետականների մեսիջները որպես իրականություն ընդունի, ապա թե՛ ՀԱԿ-ի և թե՛ «Ժառանգության» համար բավական դժվար կլինի հանրությանը բացատրել Ռոբերտ Քոչարյանի հետ համագործակցելու պատճառները: Առավել ևս, որ այս առումով որոշակի դժգոհություններ կան այս կառույցների ներսում։
Կարդացեք նաև
Երեկվա հայտարարությամբ Ռոբերտ Քոչարյանը մի կողմից փորձ է անում կանխել իր անվան հետ կապված շահարկումները, մյուս կողմից՝ չխոչընդոտել քաղաքական ուժերի միջև ուրվագծվող կոնսոլիդացիոն գործընթացները՝ շատ լավ հասկանալով, որ հնարավոր քաղաքական կոնսոլիդացիան ուղղված է լինելու առաջին հերթին ՀՀԿ-ի ու նրա առաջնորդի դեմ, հետո նոր գործելու է հանուն խորհրդարանական հանրապետության ստեղծման։
«Օրակարգ»
