«Մշակութային կյանքը պարադոքսների վրա է հիմնված, այն բուռն ծաղկման մեջ է: Մարդկային աչքերով ծնված նոր կյանք է նկարը, իսկ մշակույթը ցուցադրական երեւույթ չէ, այն ամեն ինչ է: Փողոցով քայլելը, խոսելը, քաղաքը մաքուր պահելը, ամենը մշակույթ է, նա սահմաններ չի ճանաչում՝ անսահմանափակ է»,-այսօր Aravot.am-ի հետ զրույցում ասաց ՀՀ ժողովրդական նկարիչ Ռոբերտ Էլիբեկյանը:
Նկարչի համոզմամբ , երբ արվեստանոցից գործը դուրս է գալիս, ուրեմն վերջ՝ նկարն արդեն իր կյանքն ունի, պետք է իր կյանքով ապրի: Նկարները պարտադիր չէ , որ միայն նկարչի մոտ լինեն, արվեստը մարդու համար է, հարկավոր է ի ցույց դնել աշխարհին արվեստի գործերը:
Գաֆէսճեան արվեստի կենտրոնի «Սասունցի Դավիթ» սրահում բացվեց «ԵՐԵՎԱՆ. հայացք ապագայից» ցուցահանդեսը: Ցուցադրությանը ներկայացված են հայ ազգի մեծանուն արվեստագետների գեղանկարչական և գրաֆիկական աշխատանքներ՝ անցյալ դարի առաջին կեսի երևանյան համայնապատկերներով: Միևնույն ժամանակ ընդգրկված են ժամանակակից Երևանի տարբեր լուսանկարներ, որոնք խորհրդանշում են մեր քաղաքի առաջընթացը և ապագայից հայացք ուղղորդում պատմական Երևանին:
Կրթական ծրագրերի համակարգող Լիզա Շիրինյանը մեզ հետ զրույցում նշեց, որ ծրագիրը նախատեսված է մինչեւ 15 տարեկան երեխաների համար: Առաջին մասում շրջայց է տեղի ունենում արվեստանմուշների շուրջ, երեխաները ծանոթանում են հայ անվանի նկարիչների աշխատանքներին, իսկ 2-րդ մասում տեղի է ունենում հանդիպում կենտրոնի ստեղծագործական սրահում, որտեղ զրուցում, քննարկում են Երեւանի հետ կապված հուշեր, հնչում են երգեր: Ամեն անգամ նախատեսվում է ունենալ մի հատուկ երեւանցի, որը իր հուշերով կկիսվի երեխաների հետ: Մինչ այսօր մասնակցել են 7 դպրոցներ, 1 մանկատուն եւ 200 աշակերտ:
Կարդացեք նաև
Անժելա ՇԱՀՈՒՄՅԱՆ
