ՖՈՏՈԼՈՒՐ
Ծանոթանալով Վերաքննիչ քրեական դատարանում ՀԱԿ ակտիվիստների գործով դատավարության մանրամասներին, Մարդու իրավունքների առաջին պաշտպան Լարիսա Ալավերդյանը եկել է այն եզրահանգման, որ դատավորը չի կարողացել անջատել իրեն քաղաքական համակարգից: «Գուցե չկա որեւէ պատվեր, կա այդ կախվածությունը, որը թույլ չի տալիս գոնե տարրական նորմերը պահպանել: Այնպիսի մոտեցում կա, որը թույլ չի տալիս խոսել այն մասին, որ մեր դատական իշխանությունները անկախ են քաղաքական համակարգից: Տվյալ դեպքում տեսնելով այդ փոքր վեճերը՝ կամ դատավորը ունակ չէ կարգավորել եւ ճիշտ վարել դատական գործընթացը, կամ էլ արվում են սադրիչ քայլեր, որոնք բերեն այդպիսի իրավիճակների»,- Aravot.am-ին ասաց Լ. Ալավերդյանը:
Ըստ նրա, մյուս կողմից չի կարող կոպիտ եւ ոչ ճիշտ ձեւով դիմել մեղադրյալներին, բայց. «Դահլիճում եղած ակտիվիստներն ավելի մեծ օգնություն կմատուցեին, եթե չլիներ այնպիսի ռեպլիկներ: Այնուամենայնիվ, նախապես ձեւավորված մոտեցում էր, որը թույլ է տալիս ինձ ասել, որ դատավորի անկախությունը չի երեւում: Նա կախված է ինչ-որ հանգամանքներից, եթե անգամ չկա պատվերը: Եվ երկրորդը՝ գտել եմ, գտնում եմ, որ այս գործընթացը վերին աստիճանի եւ ոչ հարիր ձեւով քաղաքականացված է: Ցավում եմ հերթական անգամ, որովհետեւ Եվրոպական դատարան հասնելու դեպքում, որպես կանոն, այսպիսի դատերը դիմողը շահում է, տուժում է պետությունը, պետության իմիջը:
Արփինե ՍԻՄՈՆՅԱՆ
