Նոյեմբերի 25-ից դեկտեմբերի 8-ը Երեւանի Մարզահամերգային համալիրում կայանալիք ԱԻԲԱ-ի բռնցքամարտի աշխարհի երիտասարդական առաջնությանը մասնակցելու հայտ ներկայացրել է 71 երկիր, այդ թվում՝ նաեւ Ադրբեջանը:
ՄՀՀ ռինգում իրենց հարաբերությունները 10 քաշային կարգերում կպարզեն 17-18 տարեկան 400-ից ավելի բռնցքամարտիկներ, որոնց իրական թիվը մեկնարկի օրը կարող է հասնել նաեւ 500-ի:
Երեւան ժամանող պատվիրակությունների անդամների ընդհանուր քանակը, սպասվում է, որ կգերազանցի 700-ը:
Կարդացեք նաև
Պատվիրակությունները Երեւան ժամանելու են նոյեմբերի 25-27-ին:
Աշխարհի երիտասարդական առաջնությունը լուսաբանելու համար Հայաստանից հավատարմագրվել է մոտ 30 լրատվամիջոց: Իսկ թե ընդհանուր առմամբ աշխարհի քանի՞ ԶԼՄ կլուսաբանի առաջնությունը, Հայաստանի բռնցքամարտի ֆեդերացիայում այսօր դժվարացան ճշգրիտ պատասխանել:
Հիշեցնենք, որ նախապես աշխարհի երիտասարդական առաջնությունը նախատեսված էր անցկացնել Թաիլանդում, սակայն այդ երկիրը հետագայում հրաժարվեց այդ գաղափարից: Եվ այդ ժամանակ ստեղծված իրադրությանն արձագանքեց Հայաստանը` ի դեմս ՀՀ սպորտի եւ երիտասարդության հարցերի նախարար Հրաչյա Ռոստոմյանի եւ Հայաստանի բռնցքամարտի ֆեդերացիայի նախագահ Արման Մուրադյանի:
Աշոտ ՀԱԿՈԲՅԱՆ
