Թիվ 1 ընտրատարածքում առաջադրված պատգամավորության թեկնածու Ստյոպա Սաֆարյանն այսօր իր ֆեյսբուքյան էջում ահազանգել է. «Նոր Նորք վարչական շրջանում գտնվող 135 դպրոցի տնօրինությունը պարտադրել է բոլոր ուսուցիչներին, որպեսզի յուրաքանչյուրն իրենց ներկայացնի նվազագույնը երկու ընտրողի անուն- ազգանուն, ովքեր հաստատապես ընտրելու են ՀՀԿ թեկնածուին: Մեր տեղեկություններով` նույնատիպ հրահանգ տալիս են թիվ 1 ընտրատարածքի բոլոր դպրոցների տնօրենները: Դրա մասին օրեր առաջ ահազանգել էին թիվ 133 դպրոցի ծնողները. իսկ այսօր նաեւ` տարբեր դպրոցների մանկավարժներ, ովքեր ուզում են ազատ ընտրություն ունենալ եւ չկատարել ապօրինի հանձնարարություններ»:
Aravot.am-ը փորձեց մեկնաբանություն ստանալ 135 դպրոցի տնօրեն Գարեգին Ներսիսյանից, սակայն դպրոցից հայտնեցին, որ նա այս պահին «ժողով է անում», որը մեկ ժամից շուտ չի ավարտվի:
Երեւանի քաղաքապետարանի աշխատակազմի կրթության վարչության պետ Գայանե Սողոմոնյանն էլ խնդրի վերաբերյալ Aravot.am-ին ասաց. «Դպրոցը կրթօջախ է, եւ այնտեղ քաղաքականությամբ զբաղվելն արգելվում է, դպրոցում պետք է իրականացվի միայն կրթական գործունեություն: Իսկ քաղաքականությամբ կարող է զբաղվել ամեն ոք՝ ըստ իր նախասիրությունների, բայց կրթական հաստատությունների պատերից դուրս եւ ոչ աշխատանքի ժամին»:
Կարդացեք նաև
Տիկին Սողոմոնյանը նաեւ վստահեցրեց, որ քաղաքապետարանի կրթության վարչությունը անպայման հետեւողական կլինի՝ խնդրի մանրամասները պարզելիս:
Գոհար ՀԱԿՈԲՅԱՆ
