ՀԱԿ խմբակցության պատգամավոր Նիկոլ Փաշինյանը ՀԱԿ ակտիվիստների գործով դատավճիռը համարում է արդարադատության ծաղր: «Եթե հիշում եք, Սերժ Սարգսյանը վերջին շրջանում արդարադատության հետ կապված խորհրդակցություններ էր անում, տեսնում ենք այդ խորհրդակցության արդյունքը: Ամբաստանյալին վերջին խոսքի իրավունքից զրկում են: Գուցե հաջորդ խորհրդակցությունից հետո կզրկեն պաշտպան ունենալու իրավունքից, հաջորդ խորհրդակցությունից հետո էլ դատարաններն ընդհանրապես կլինեն դռնփակ կամ դատավճռի կարիք էլ չի լինի, կտանեն Սերժ Սարգսյանը դատավճիռները կստորագրի եւ դրանով բավական է»,- այսօր Վերաքննիչ քրեական դատանի մոտ ասաց պատգամավորը:
Ըստ նրա, ոլորտում փոփոխություններ չեն կարող լինել, քանի դեռ երկրում ապօրինի իշխանություններն են գործում. «Էական չէ , ինչ վճիռ կկայացնեն, էականն այն է, որ ցանկացած վճիռ լինելու է ապօրինի: Ու քանի դեռ Հայաստանում օրինական իշխանություն չի հաստատվել, ոչ մի բան չի լինելու»:
Արփինե ՍԻՄՈՆՅԱՆ
