Արտակ Նազարյանի մահվան գործով դատավարության նոյեմբերի 13-ի նիստը չկայացավ: Դատական նիստին չէին ներկայացել տուժողի իրավահաջորդը, վերջինիս ներկայացուցիչները, ամբաստանյալների պաշտպանները: Պաշտպաններից Լեւոն Պողոսյանը հեռախոսով հայտնել էր, որ դատական նիստին չի կարող ներկայանալ, որ այն կարող է կայանալ առանց իր մասնակցության:
Ամբաստանալ Հարութիկ Կիրակոսյանը, Մխիթար Մխիթարյանը եւ Ադիբեկ Հովհաննիսյանը հայտարարեցին, որ դատը կարող է կայանալ առանց իրենց պաշտպանների մասնակցության, սակայն քրեական գործով գլխավոր ամբաստանյալ Հակոբ Մանուկյանն ասաց, որ առանց իր պաշտպանների դատական նիստը չի կարող կայանալ, որ պաշտպանների «խոսելու ժամանակն է»:
Դատավոր Սամվել Մարդանյանը պաշտպանների բացակայությունը համարեց անհարգելի եւ դատը հետաձգեց մինչեւ նոյեմբերի 14-ը:
Տուժողի իրավահաջորդի ներկայացուցիչ, պաշտպան Մուշեղ Շուշանյանից տեղեկացանք, որ այսօր նախագահական նստավայրի առաջ տուժող կողմը եւ ամբաստանյալների հարազատները բողոքի ակցիա են անցկացնում ընդդեմ դատավոր Մարդանյանի: Ակցիային մասնակցելու են նաեւ «Բանակն իրականում» քաղաքացիական նախաձեռնության անդամներ, քաղաքացիական հասարակության այլ ներկայացուցիչներ:
Կարդացեք նաև
«Վերջին նիստերին դատավոր Մարդանյանը արդարադատության դեմ անընդհատ հանցանքներ է գործում: Պահանջելու ենք, որպեսզի դադարեցվեն դատավորի նրա լիազորությունները եւ նրա դեմ քրեական գործ հարուցվի»,-մեզ հայտնեց պաշտպան Շուշանյանը;
Ոսկան ՍԱՐԳՍՅԱՆ
