Էպոսագետ Վարդան Սեդրակյանը, որը նախագահական ընտրություններում առաջադրել է իր թեկնածությունը, այսօր հայտարարեց, որ ինքը կվճարի «Ժառանգություն» կուսակցության առաջնորդ, նախագահի թեկնածու Րաֆֆի Հովհաննիսյանի ընտրագրավը եւս, քանի որ վերջինս ասել էր, որ այդ 8 մլն դրամը պետք է ժողովրդի հանգանակություններից ստացված գումարով վճարի: Չնայած լրագրողների պնդմանը, թե որտեղից իրեն այդ գումարները, Սեդրակյանը գաղտնի պահեց իր հովանավորների անունները՝ նույնիսկ չասելով, վերջինները Հայաստանից են, թե արտասահմանից, փոխարենը նշեց. «Եթե ընտրությունների արդյունքում Րաֆֆի Հովհաննիսյանը հաղթահարի 5%-ի շեմը, ինչը ենթադրում է, որ պետությունը հետ կվերադարձնի գրավը, ապա նա հետ կտա իմ փողը, չհաղթահարելու դեպքում՝ չեմ պահանջի գումարը», -նշեց Սեդրակյանը, հավելելով, որ մնում է սպասել Րաֆֆի Հովհաննիսյանի արձագանքին, քանի որ համապատասխան գումարն արդեն ծրարի մեջ է,- «Ես չգիտեմ կհամաձայնվի նա, թե ոչ, դա իր անձնական գործն է»: Իր շռայլությունը Սեդրակյանը մեկնաբանեց հետեւյալ կերպ. «Րաֆֆի Հովհաննիսյանը այն մարդն է, որը ոչ մի վատ քայլի չի գնա, ընտրակաշառքներ չի բաժանի»: Չհրապարակելով իր «փողի աղբյուրները», Սեդրակյանը միայն ասաց, որ հաղորդումներ է ունեցել էպոսի վերաբերյալ, սեմինարներ անցկացրել, հրապարակումներ ու վերլուծություններ տպագրել: Բացի այդ ինքը բավականին ապահովված է, քանի որ միայն վերջին 2 տարում 170 հազար ԱՄՆ դոլար ծախսել է միայն ավտոմեքենաներ գնելու վրա, 2 առանձնատուն է կառուցում, եւ այդ ամենն իր անձնական գումարներով:
Շարունակելով փողի թեման, հարուստ էպոսագետը նշեց. «փողը չունի ազգություն, գույն, մի՛ անհանգստացեք: Թող ձեզ այդքան չմտահոգի իմ փողերի հետ կապված հարցը, մեր երկրում կան համապատասխան կառույցներ, որոնք խնդիրների առաջացման դեպքում կարող են ստուգել ու ձեզ տեղեկացնել, այնպես ինչպես Օսկանյանի դեպքում էր: Ես ունեմ անուն, որը բավարար է»: Իսկ ինչպես է վարվելու էպոսագետը, նախկին նախագահների հետ, եթե ինքը դառնա նախագահ` Սեդրակյանը ասաց,.«Եթե դառնամ նախագահ, նախորդ 3 նախագահներին կնշանակեմ ինձ խորհրդական»: Իսկ եթե չուզե՞ն. «Կարծում եմ, քանի որ իրենք նախագահ եղել են, լավ գիտեն, թե ինչ է նշանակում նախագահի հրամանագիրը, չեմ կարծում, թե նրանցից որեւէ մեկը չցանկանա կատարել հրամանագիրը»:
Կարդացեք նաև
Եվա ՀԱԿՈԲՅԱՆ
