Նոյեմբերի 12-ին ԱԺ պետական-իրավական հարցերի մշտական հանձնաժողովը Հովհաննես Մարգարյանի նախագահությամբ քննարկեց եւ ԱԺ աշնանային, ինչպես նաեւ առաջիկա քառօրյա նիստերի օրակարգերի նախագծերում ընդգրկվելու համար դրական եզրակացություն տվեց ՀՀ կառավարության հեղինակած «ՀՀ դատական օրենսգիրքն ուժի մեջ մտնելու մասին» ՀՀ օրենքում փոփոխություն կատարելու մասին» եւ «ՀՀ դատական օրենսգրքում փոփոխություն եւ լրացում կատարելու մասին» ՀՀ օրենքների նախագծերի փաթեթին, որը ներկայացրեց ՀՀ արդարադատության փոխնախարար Գրիգոր Մուրադյանը:
Նա տեղեկացրեց, որ նկատի ունենալով ՀՀ վարչական դատարանի դատավորների գերծանրաբեռնվածությունը՝ առաջարկվում է 10-ով ավելացնել վարչական դատարանի դատավորների թիվը: Արդարադատության փոխնախարարի տվյալներով՝ այսօր այդ դատարանում յուրաքանչյուր դատավոր տարեկան քննում է 850-1000 գործ:
Առաջարկվում է նաեւ կատարել փոփոխություն, որը վերաբերում է դատավորների՝ մինչ կենսաթոշակային տարիքի հասնելը կենսաթոշակ ստանալու հիմքերին: Այն դատավորները, ովքեր մինչեւ կենսաթոշակային տարիքի հասնելը կունենան այնպիսի հիվանդություն կամ ֆիզիկական արատ, որի հիմքով կդադարեցվեն նրանց լիազորությունները, կարող են ստանալ դատավորի կենսաթոշակ՝ հաշմանդամության կենսաթոշակից օգտվելու պահից սկսած:
Զեկուցողի խոսքով՝ փոփոխությունների ընդունմամբ կնվազեցվի վարչական դատարանի ծանրաբեռնվածությունը եւ կապահովվի տարբեր դատարանների դատավորների սոցիալական ապահովության հավասարեցված մոտեցում:
ԱԺ տնտեսական հարցերի մշտական հանձնաժողովը Վարդան Այվազյանի նախագահությամբ նույնպես նիստ գումարեց եւ քննարկեց «Շահութահարկի մասին» ՀՀ օրենքում փոփոխություններ եւ լրացում կատարելու մասին» եւ «Ավելացված արժեքի հարկի մասին» ՀՀ օրենքում փոփոխություն կատարելու մասին» օրինագծերի փաթեթը, որը ներկայացրեց ՀՀ ֆինանսների նախարարի տեղակալ Սուրեն Կարայանը:
Առաջին նախագծով առաջարկվում է սահմանված կարգով պետության կամ լիազորված մարմնի կողմից հաստատված սակագների կիրառության հետ կապված` պետական բյուջեից տրվող սուբսիդիաները շահութահարկով հարկման նպատակով ներառել համախառն եկամտի մեջ` որպես այդ սուբսիդիաների ստացման դիմաց կատարվող` ապրանքների մատակարարման, ծառայությունների մատուցման կամ աշխատանքների կատարման գործարքներից ստացվող հասույթ:
Երկրորդ նախագծով առաջարկվում է պետական բյուջեից տրամադրվող սուբսիդիաները, սուբվենցիաները եւ դրամաշնորհներն ավելացված արժեքի հարկով հարկման օբյեկտ չդիտարկել միայն այն դեպքերում, եթե դրանց դիմաց գումարներ ստացողների մոտ ապրանքներ մատակարարելու կամ ծառայություններ մատուցելու պարտավորություն չի առաջանում:
Հանձնաժողովը դրական եզրակացություն տվեց օրինագծերի փաթեթին ԱԺ քառօրյա նիստերի օրակարգում ընդգրկվելու համար:
ՀՀ ԱԺ
