«Բարգավաճ Հայաստան» եւ Հանրապետական կուսակցությունները այսօր Ռուսաստանի «Եդինայա Ռոսիա», Ուկրաինայի «Պարտիա ռեգիոնով» եւ Ղազախստանի «Նուռ Օտան» կուսակցությունների հետ Երեւանում եվրասիական միջկուսակցական խորհրդակցություններ էին հրավիրել:
ՀՀԿ փոխնախագահ Արմեն Աշոտյանը, պատասխանելով հարցին, թե ռուսական կողմը այս համաձայնությամբ չի՞ պատկերացնում եվրասիական միության ամրապնդում եւ Հայաստանի հետ միավորում, ասաց. «Վաղ է խոսել վերջնաարդյունքների մասին: Հայաստանն ու ՀՀԿ-ն կարեւորում են ցանկացած ինտեգրացիոն նախագիծ ԱՊՀ տարածքում: Ցանկացած ինտեգրացիոն նոր նախագիծ հնարավորություն կարող է տալ մեր երկրին լավագույնս ամրապնդել սեփական տնտեսական, ռազմաքաղաքական եւ հանրային շահերը: Չենք կարծում, որ այս նախաձեռնությունը քաղաքական բեւեռացման առիթ պետք է տա մեր քաղաքական կյանքում: Հայաստանը պետք է լինի այնտեղ, որտեղ գիտենք՝ ինչ նպատակով ենք եւ մեր հասարակությանը հավելյալ օգուտներ կբերենք՝ լինելով այս կամ այն քաղաքական ձեւաչափով: Կուսակցական ձեւաչափը չի նշանակում ուղիղ պրոյեկցում այսօրվա ձեւաչափի, պետական կարծիքների կամ քաղաքական համակարգի վրա: Շատ ավելի լայն շրջանակ ենք դիտարկում: Եվրասիական միջկուսակցական ֆորմատը ՀՀԿ-ի համար կարող է շատ կարեւոր ֆորմատ լինել»:
Թե ինչու էին խորհրդակցություններին մասնակցելու համար հրավիրված միայն ՀՀԿ-ն ու ԲՀԿ-ն՝ ՀՀԿ փոխնախագահ Էդուարդ Շարմազանովը բացատրեց.«Ոչ միայն ընդդիմադիր, այլեւ ՕԵԿ-ից չկան: Այն կուսակցություններն են, որոնք ունեն միջկուսակցական ստորագրված պայմանագրեր, միջազգային գործընկերության փորձ: Այստեղ նաեւ գաղափարական հարցը կա, ավելի շատ պահպանողական կուսակցություններն են»:
ԲՀԿ պատգամավոր Տիգրան Ուրիխանյանն էլ հավելեց, որ միջկուսակցական հարթակը առավելություն է տալիս ավելի անկաշկանդ առաջադրել այն հարցադրումներն ու խնդիրները, որոնք, միգուցե պաշտոնական Երեւանը արտաքին հարաբերությունների ձեւաչափի մեջ, մեղմ ասած, կաշկանդված է:
Կարդացեք նաև
Աշխատանքային խորհրդակցությունները լրատվամիջոցների համար փակ էին: Խորհրդակցությունների ընթացքում քննարկվելու են ԱՊՀ երկրներում դեմոկրատական գործընթացների հետ կապված հարցեր եւ կմշակվի ԱՊՀ երկրների կուսակցությունների միջեւ կապերի ամրապնդմանն ուղղված նոր միջկուսակցական պլատֆորմ:
Արփինե ՍԻՄՈՆՅԱՆ
