ՕԵԿ փոխնախագահ Հովհաննես Մարգարյանի համոզմամբ, կառավարման խորհրդարանական համակարգին անցնելու ԲՀԿ-ի առաջարկը ժամանակավրեպ է եւ պահանջում է տեւական ժամանակ փուլային գործընթաց: Այսօր «Peeplemetter» ակումբում պարոն Մարգարյանն ասաց, որ այդ առաջարկի շուրջ քաղաքական խորհրդատվություններին մասնակցելու պաշտոնական հրավեր ՕԵԿ-ը ԲՀԿ-ից դեռ չի ստացել: «Հարգանքով եմ մոտենում այդ որոշմանը եւ ըստ էության քաղաքական ուժի հայտարարության հետեւում տեսնում եմ տվյալ քաղաքական ուժին»:
Հարցին՝ ՕԵԿ-ը կմասնակցի՞ այդ խորհրդատվությանը պարոն Մարգարյանն ասաց. «Երբ կներկայացվեն առաջարկներն ու հիմնավորումները, ՕԵԿ-ը օպերատիվ կքննարկի ու որոշում կկայացնի, կա հայտարարություն, չկա որեւէ փաստաթուղթ»:
Պարոն Մարգարյանը նկատեց, որ ի տարբերություն 2008-ի նախագահական ընտրությունների, այս անգամ քաղաքական ուժերն ավելի ուշ են կողմնորոշվում թեկնածուների առաջադրման առումով. «Քաղաքականությունն ավելի շատ անձնավորված է, ոչ թե կուսակցականացված»:
Արփինե ՍԻՄՈՆՅԱՆ
