Իսկապես իրադարձություն է հայաստանյան մշակութային կյանքում. «Երեւանյան հեռանկարներ» 13-րդ երաժշտական միջազգային փառատոնի շրջանակներում հյուրընկալել նիդեռլանդական Թագավորական Կոնցերտգեբաու նվագախմբին: Համերգը կկայանա այսօր՝ «Արամ Խաչատրյան» համերգասրահում:
Շուրջ 125-ամյա նվագախումբը մինչ օրս ունեցել է 6 գլխավոր դիրիժոր՝ Վիլլեմ Քես, Վիլլեմ Մենգելբերգ, Էդուարդ Վան Բեինում, Բեռնար Հաիթինգ, Ռիկարդո Շային, իսկ 2004-ից՝ Մարիս Յանսոնս: Երեւանյան համերգը կղեկավարի լեգենդար դիրիժոր Լորին Մաազելը: Փարիզում ծնված երկրորդ սերնդի ամերիկացի Մաազելը 5 տարեկանում սկսել է ջութակ նվագել, իսկ 7-ում՝ դիրիժորության դասեր առնել: 9-15 տարեկանում նա ղեկավարել է ամերիկյան հայտնի նվագախմբերը, այդ թվում՝ Արթուրո Տոսկանինիի հրավերով՝ NBC սիմֆոնիկը: Ավելի քան 5 տասնամյակների ընթացքում մաեստրո Մաազելը հանդիսանում է առավել նշանավոր ու պահանջված դիրիժորներից եւ այսօրվա դրությամբ ղեկավարել է ավելի քան 150 նվագախումբ: Հայ հեռուստադիտողները դիրիժորի արվեստին հաղորդակից են եղել դիտելով Վիեննայի ֆիլհարմոնիկ նվագախմբի հետ թվով 11 միջազգային հեռուստատեսային ամանորյա համերգները, որտեղ հաճախ նա հանդես է եկել նաեւ որպես ջութակահար: Վերջերս ավարտելով իր 7-րդ՝ վերջին համերգաշրջանը՝ իբրեւ Նյու Յորքի ֆիլհարմոնիկի երաժշտական ղեկավար, Լ. Մաազելը ստանձնել է Մյունխենի ֆիլհարմոնիկ նվագախմբի գլխավոր ղեկավարի պաշտոնը:
Aravot.am-ը հետաքրքրվեց՝ ճանաչված այլ նվագախմբեր ղեկավարած լինելով, ինչպե՞ս է վերաբերվում ընդունված այն կարծիքին, թե Կոնցերտգեբաուն աշխարհի թիվ 1 նվագախումբն է: «Փորձում եմ չհամեմատել ոչ միայն նվագախմբերը, այլեւ զուգահեռներ չանցկացնել մենակատար-երաժիշտների, կոմպոզիտորների միջեւ: Հանճարեղներին չեն համեմատում: Ինձ համար լավագույնը համարվել է կոնկրետ ժամանակահատվածում ղեկավարածս ցանկացած նվագախումբ, որի գլխավոր ղեկավարն եմ եղել»,- պատասխանեց Լորին Մաազելը:
Դիրիժորին տեղեկացրինք, որ մինչ նվագախմբի ժամանումը Հայաստան, լուր ունեինք, թե իրենց հետ կժամանի նաեւ մեր հայրենակիցը՝ աշխարհահռչակ ջութակահար Սերգեյ Խաչատրյանը, նվագախմբի հետ մեծանուն Խաչատրյանի Ջութակի կոնցերտը հնչեցնելու համար՝ նշելով, որ Խաչատրյանի հայրենիքում կոմպոզիտորի ստեղծագործության կատարումը միանշանակ պատիվ է նաեւ Թագավորական նվագախմբի համար: Լորին Մաազելը ոչ հերքեց եւ ոչ էլ հաստատեց լուրը: Նա միայն ասաց, թե ինքը տարբեր ժամանակներում ու տարբեր նվագախմբերի հետ ղեկավարել է Խաչատրյանի Դաշնամուրային կոնցերտը ու «Սուսերով պարը»: Հավելեց, թե իր ու Սերգեյ Խաչատրյանի մեկնաբանմամբ Ջութակի կոնցերտը հավանաբար կհնչի հաջորդ այցին:
Կարդացեք նաև
Սամվել ԴԱՆԻԵԼՅԱՆ
