«Պարզապես նյարդայնանում եմ, երբ ինձ ասում են «ազիզ» կամ թեկուզ «ազիզ ջան», – ասում է 18-ամյա Ալինան:
«Առավոտ երիտասարդականն» այս անգամ փորձում է պարզել՝ որո՞նք են երիտասարդների չսիրած դիմելաձեւերը, բառերն կամ արտահայտությունները:
19-ամյա Տարոնն էլ չի սիրում, երբ աղջիկները միմյանց ասում են՝ սերս, կյանքս, միակս… ու նման բաներ, «Լրիվ ուրիշ տիպի մարդու տպավորություն են թողնում», – ասում է նա :):
20 – ամյա Լիանան էլ «տանել չի կարողանում» տղաների խոսակցականի մեջ մտած «արա» բառը, «Իսկ ամենավատն այն է, որ նրանք երբեմն կամա թե ակամա այդպես են դիմում նաև աղջիկներին», – նշում է նա:
«Ցավդ տանեմ», սա էլ է հայտնվել նյարդայնացնող արտահայտությունների շարքում, հատկապես, երբ դա տղաներն ասում են աղջիկներին, «Բա որ ի պատասխան դրան ասում են՝ ցավս շատ ա, չես կարա տանես 🙂 իմա՞ստը», – ծիծաղում է 17-ամյա Արևիկը:
Շատ աղջիկներ չեն սիրում նաև, երբ տղաներն իրենց ասում են՝ ախպերս. այդ աղջիկներից մեկն էլ 19-ամյա Էլենն է:
21-ամյա Գևորգն էլ նյարդայնանում է աղջիկների «նուրբ» գրելաոճից, հատկապես սոցցանցերում, երբ «Լ»-երով են գրում, ինչպես օրինակ՝ մեԼնեմ քեզ, սԼտիկ և այլն, «Հետաքրքիր է՝ ո՞վ է իրենց ասել, որ այդպես ավելի նուրբ է հնչում», – նշում է նա:
Տիգրանուհի Թասլակյան
