ՀՅԴ-ի ներկայացրած Ընտրական օրենսգրքում փոփոխություններ կատարելու եւ 100% համամասնական ընտրակարգին անցնելու օրինագծի առնչությամբ այսօր ԱԺ Պետաիրավական հանձնաժողովի նիստում կառավարության տեսակետը ներկայացրեց արդարադատության նախարար Հրայր Թովմասյանը:
Ըստ նրա, համամասական ընտրակարգով նենգափոխվում են ընտրողների ձայները. «Քաղաքական ուժերից բոլորը, բացի ՀՀԿ-ից, որոնք անցել են համամասնական ընտրակարգով, հետընտրական պրոցեսներում ունեցել են խնդիրներ՝ այս կամ այն ցուցակում լինել-չլինելու, նրան հարկադրելու դուրս գալու, ընտրությունից հետո հայտարարելու, որ ինքը ԱԺ չի գնում եւ այլն: Ես քվեարկում եմ, որովհետեւ այդ ցուցակի առաջին համարը, երկրորդ համարը, երրորդ համարը իմ ծանոթն է, բայց ընտրությունից հետո պարզվեց, որ ինքը չի լինելու ԱԺ-ում կամ ինչ-որ համաձայնություններ կան, որ ինքը ԱԺ չէր գնալու: Այդ դեպքում այդ ցուցակին ոչ ոք չէր քվեարկի: Ցանկացած ընտրական համակարգ պետք է երկու խնդիր լուծի՝ ապահովի ներկայացուցչական ԱԺ եւ երկրորդ խնդիրը՝ պառլամենտական մեծամասնություն ապահովի: Կիսանախագահական կառավարման համակարգում նման մեծամասնությունն անհրաժեշտություն է: Չի կարելի ընտրողին տրված երկու ձայները մի հարթության վրա դնել: Փոքր կուսակցությունները մեծամասնական համակարգով չեն անցնում: Սա նորություն չէ: Ամբողջ աշխարհում է այսպես»:
Զարուհի Փոստանջյանը նախարարին հարցրեց՝ «Դուք էլ եք եղել ցուցակում, ձեր նախագահն էլ է եղել ցուցակում: Հասարակությունը ձեզ է ձայն տվել: Դուք հիմա խաբե՞լ եք հասարակությանը, թե՞ ոչ, խաբեբայությո՞ւն եք դա դիտարկում»: Հրայր Թովմասյանը պատասխանեց. «Ես եղել եմ անցողիկ համարներում ՀՀԿ-ի: Եթե կառավարություն չձեւավորեր, ես այսօր կլինեի պատգամավոր: Դա միանգամայն այլ բան է, քան այն, որ ընտրություններից առաջ պայմանավորվեինք, որ դուրս ենք գալու, ուրիշներն են լինելու»:
Զարուհի Փոստանջյանը նաեւ հարցրեց՝ «Ձեր վարչապետը եւ ձեր կառավարությունը բազմիցս նշել է, որ ՀՀ-ում կան օլիգարխներ, օլիգոպոլիաներ: Ձեր ասած 30 կամ 20 հազար ձայնը ստանում է այդ օլիգարխի որդին կամ նույն օլիգարխը, ունե՞ք այդպիսի ուսումնասիրություն վերջին խորհրդարանական ընտրություններից, թե որքան է մեծամասնական թեկնածուն ավելի ձայն ստացել եւ ինչպե՞ս եղավ, որ տվյալ բնակչության թվաքանակը 10 հազարով ավելացավ: Օրինակ, թիվ 4, թիվ 38 ընտրատարածքում բնակչության թիվն ավելացել է, 2007-ին եղել է 50 հազար, այսօր դարձել է 60 հազար: Ինչո՞վ եք սա բացատրում՝ հաշվի առնելով արտագաղթը»: Նախարարն ասաց. «Մի օլիգարխն ինձ ամենամոտն է նստած»: Քանի որ նրա կողքին Դավիթ Հարությունյանն էր, վերջինս աճապարեց հարցնել՝ ո՞ւմ նկատի ունեք, կներեք: Հրայր Թովմասյանը պատասխանեց, որ նկատի ունի Էդմոն Մարուքյանին: «Աստված ձայնդ լսի»,- ասաց անկուսակցական եւ մեծամասնականով անցած Էդմոն Մարուքյանը:
Կարդացեք նաև
Ինչ վերաբերում է բնակչության ավելացման թվերին, Հրայր Թովմասյանը խորհուրդ տվեց համակարգչային ծրագրով բացել եւ հաշվել:
ՀԱԿ պատգամավոր Գագիկ Ջհանգիրյանը հիշեց «ողորմածիկ Վլադիմիր Նազարյանին». «Մեր լավագույն սահմանադրագետն էր: Նա այսպիսի բան էր ասում՝ ցանկացած թեզ բերեք, ես դա ե՛ւ հիմնավորեմ, ե՛ւ հերքեմ: Չկա բացարձակ ընտրական համակարգ: Դրա համար անիմաստ է, Հրա՛յր, ասել, թե սա լավ է: Ոչ խառը համակարգն է մի բան, ոչ մեծամասնականը, ոչ էլ համամասնականը: Կարեւորը՝ թե ինչպես ենք մենք դա կյանքում իրագործում: Բնական է, որ կառավարությունը դեմ պիտի լինի, որովհետեւ այդ կառավարությունը ձեւավորվել է դրա արդյունքում, ո՞նց կարող է դեմ չլինի»:
Հռիփսիմե ՋԵԲԵՋՅԱՆ
