«Մեզանում կեղծ ըմբռնում կա, համաձայն որի` եթե մրցակցություն չկա, ուրեմն ազատություն չկա: Այսինքն` երկու կամ ավելի թեկնածուի գաղափարը ֆետիշացվում է: Ճիշտ է, մրցակցության բացակայության պայմաններում դեգրադացիա է տեղի ունենում, բայց այդպես ասողները չեն անդրադառնում այն հարցին, թե ինչու չկա մրցակցություն եւ ինչու է ընտրությունների ելքը կանխորոշելի: Նրանք պետք է հաշվի առնեն, որ այս տարիների ընթացքում ընդդիմության ներկայացուցիչները մսխեցին երկրի հնարավորությունները, անպտուղ քննադատությամբ եւ միտինգներով զբաղվեցին»,-այսօր «Հայելի» ակումբում ասաց գրականագետ Վարդան Դեւրիկյանը:
Նրա խոսքով. «Մեր ընդդիմության թերությունն այն է, որ երկրում փոփոխություն կատարելու համար մտածում են վերցնել իշխանությունը: Եթե հիշենք 1990-ականները, ՀՀՇ-ն փոքր քայլերով փոփոխություններ էր անում, իսկ հիմա խոսք է գնում հայեցակարգերի փոփոխություններից, ազատության վերացական ըմբռնումներից, բայց միթե այսօրվա մարդու հոգսը ազատությունն է: Դա բացարձակ արժեք է: Դժբախտաբար, մեր կյանքում ազատությունն այսօր ավելցուկ է համարվում: Երկրում որեւէ բան փոխելու համար պարտադիր չէ իշխանության մաս կազմել»:
Պարոն Դեւրիկյանը կարծում է, որ այսօրվա ընդդիմության յուրահատկությունը ժողովրդի դեմ ընդդիմանալն է. «Խորհրդարանական ընտրություններից հետո ընդդիմությունը սկսեց ժողովրդին անիծել եւ փնովել, թե ձայները ծախել են 5000 դրամով: Այդպես ընտրակաշառքը ֆետիշացրեցին եւ չկարողացան հասնել այն պարզ ըմբռնմանը, որ 5000-ն ավելին արժեր, քան իրենք»:
Լուիզա ՍՈՒՔԻԱՍՅԱՆ
