Շուտով հանրությանը կներկայացվի նոր, կարճամետրաժ ֆիլմ: «Կինը». այսպես է վերնագրված այն, տևողությունն էլ 11 րոպե է: «Ինչպես բոլոր ֆիլմերը, այս ֆիլմը ևս գեղարվեստորեն է ներկայացված, բայց հիմքում ընկած է իրական պատմություն», – ասաց ֆիլմի ռեժիսոր Արշակ Զաքարյանը: Ֆիլմում ներկայացված է հայ կնոջ կերպարը, ով իր որդուն ճանապարհում է զինվորական ծառայության: Ռեժիսորի խոսքով՝ այդպիսի կանայք մեր մեջ շատ են, ու հայ ազգը հենց դրանով է տարբերվում շատ այլ ազգերից: «Եղան կանայք, ովքեր պատերազմում կորցրեցին իրենց ամուսիններին, բայց այդ դժվարությունն իրենց ուսերին վերցրած` մեծացրեցին ու ճիշտ դաստիարակություն տվեցին իրենց որդիներին», – նշեց ռեժիսորը: Հենց այս միտքն էլ առաջին պատճառն է եղել նկարահանելու ֆիլմ՝ իսկական հայ կնոջ մասին ու ներկայացնելու ամբողջ աշխարհին, որ հենց սա է հայ կինը: Խոսելով այժմյան ֆիլմերի ու սերիալների մասին` Արշակ Զաքարյանն ասաց. «Հիմա մարդիկ մոռանում են խոսել դրականի մասին և խոսում են միայն այն փոքր բացասականի մասին ու ներկայացնում հային հենց այդ բացասական տեսանկյունից՝ գետնին հավասարեցնելով եղածը, իհարկե ես չեմ հերքում, որ բացասականն էլ կա, բայց ինչո՞ւ ներկայացնել վատը, եթե լավն ավելի շատ է»: Նա նաև հավատացրեց, որ շարունակելու է նկարահանել այսպիսի ֆիլմեր ու ներկայացնել հանրությանը հայի հենց այս կերպարը:
Թե երբ կլինի ֆիլմի պրեմիերան, ռեժիսորը դժվարացավ ստույգ ասել, բայց խոստացավ, որ երկար չենք սպասի: Նա նշեց նաև, որ ֆիլմը չի հետապնդում կոմերցիոն նպատակներ:
Տիգրանուհի Թասլակյան
