Ինչպես հայտնել էինք, ՆՓԱԿ-ում այսօր տեղի ունեցավ հայազգի ֆոտոլրագրող Ալեքսանդրա Ավագյանի լուսանկարների ցուցահանդեսը: Ողջույնի խոսքով հանդես եկած ՀՀ-ում ԱՄՆ դեսպան Ջոն Հեֆերնը անդրադարձավ նաեւ ԱՄՆ նախագահական ընտրություններին եւ ասաց. «Հետաքրքիր ընտրարշավի ականատես եղա: Երկու կողմերն էլ ուժեղ էին` տարբեր տեսակետերով, փորձով, քաղաքական փիլիսոփայությամբ եւ գաղափարներով: Ընթանում էր գաղափարական մրցակցություն, եւ կարծում եմ` մրցակցությունը հենց այդպիսին պետք լինի»:
Դեսպանի խոսքով. «Ռոմնին, այսպես կոչված, բարեհոգի ելույթ ունեցավ, իսկ Օբաման կարեւոր մի բան ասեց, համաձայն որի` «ամերիկյան երազանքն» այն է, երբ նշանակություն չունի քաղաքացու ազգությունը, արմատները, ֆինանսական կարողությունը: Եթե եռանդուն ես աշխատում, ուրեմն հաջողության հասնելու հնարավորություններ ունես: Բազմազանությունը մեր ուժի գրավականն է»:
Ընդգծելով տարբեր ազգերի միջեւ համագործակցության կարեւորությունը` Հեֆերնը պատմեց. «Երբ աշխատում էի Ինդոնեզիայի մայրաքաղաք Ջակարտայում, մահմեդական ընկերներ էի ձեռք բերել եւ նրանց հետ անգամ նուրբ հարցեր էինք քննարկում: Մենք պետք է երկխոսենք մեզանից տարբերվող մարդկանց հետ»:
Կարդացեք նաև
Վերջում դեսպանը կատակեց, թե երկու անգամ է ընտրել` փոստով նամակ ուղարկելով Վիրջինիա, իսկ երկրորդ անգամ քվեարկել է «հավեսի համար»:
Լուիզա ՍՈՒՔԻԱՍՅԱՆ
