Երբ գնում էի Երեւանի Շախմատի տուն` մասնակցելու Հայաստանի շախմատի հավաքականի առաջատար, օլիմպիական եռակի չեմպիոն Լեւոն Արոնյանի` նոյեմբերի 6-ին կայանալիք շախմատային միաժամանակյա սեանսին, որոշել էի ինչքան հնարավոր է պաշտպանողական խաղ ցուցադրել:
Երեւի հասկանալի էր իմ մարտավարությունը. վերջ ի վերջո խաղալու էի երկրագնդի երկրորդ շախմատիստի հետ:
Սակայն խաղի ընթացքում «հավեսի ընկա», նույնիսկ շախ հայտարարեցի շախմատային «հսկային»: Դիմացա մոտավորապես 25 քայլ: Սակայն վերջում շատ հետաքրքիր իրավիճակ էր ստեղծվել. կամ Արոնյանը շախ եւ մատ պիտի հայտարարեր ինձ, կամ ես` նրան: Բնական է ինքն ինձանից առաջ ընկավ:
Բոլորը պարտվեցին: Ամենից շատ երկար խաղաց եւ քիչ էր մնում ոչ-ոքի գրանցեր հանդիպումը Սուրեն Բաղդասարյանը:
Հետաքրքիրն այն էր, որ ամեն րոպե խաղատախտակին էին մոտենում «Շախմատի տան» մշտական գրանցում ստացած տարեց անդամները եւ խորհուրդ տալիս Բաղդասարյանին քայլեր անելիս, ինչը նրան բավականին նյարդայնացնում էր: Ի վերջո` լավ խաղ ցուցադրած սպորտային մեկնաբանը պարտվեց:
«Հույսի կամուրջ» կազմակերպության նախաձեռնած «Սպորտը` հանուն հավասար հնարավորությունների» խորագրով այս միջոցառման նպատակը հանրության ուշադրությունը հրավիրելն էր հաշմանդամություն ունեցող մարդկանց համար հավասար հնարավորություններ ստեղծելու գաղափարին:
Սեանսի մասնակիցների թիվն ավելի քան 25-ն էր, որոնց թվում էին հատուկ կարիքներ ունեցող մարդիկ եւ լրատվամիջոցների ներկայացուցիչներ:
«Հույսի կամուրջ» կազմակերպության ղեկավար Սուսաննա Թադեւոսյանը Լեւոնին նվիրեց նոյեմբերյանցի մի գեղանկարչի հեղինակած Արոնյանի նկարը:
Առանց նվերի չմնացին նաեւ սեանսի մասնակիցները. բոլորը ստացան Արոնյանի հետ լուսանկարներ` իր ստորագրությամբ, որոնք արվել էին միջոցառման ընթացքում:
Տիգրան Հովհաննիսյան` (mynews.am)
