Հոկտեմբերի 21-26-ը Ռուսաստանի Դաշնության Դոնի Ռոստով քաղաքում կայացել է «Կովկասը մեր ընդհանուր տունն է» ուսանողական միջազգային փառատոնը: Հայաստանից մասնակցել է Երեւանի ճարտարապետության եւ շինարարության համալսարանը:
Համալսարանի ռեկտոր Հովհաննես Թոքմաջյանի խոսքով, իրենք մասնակցել են ինչպես մշակութային միջոցառումներին, այնպես էլ շախմատային մրցաշարին: Վերջինի ժամանակ ԵՃՇՊՀ-ի երեք ներկայացուցիչները` Հովհաննես Քելեջյանը, Դավիթ Պապիկյանը եւ Նարե Առաքելյանը, հաղթել են բոլոր մրցակիցներին եւ դարձել են փառատոնի չեմպիոն: Թոքմաջյանը կարծում է, որ սա բարի ավանդույթների շարունակությունն է, քանի որ վերջին շրջանում հայ շախմատիստները տարբեր տեղերից վերադառնում են հաղթանակներով: Ըստ նրա, նույնսիկ ուսանողական մրցաշարում գերտերություններին հաղթելը մեծ նշանակություն ունի:
«Շախմատը նաեւ ինժեներական մտածողության ծրագրերից մեկն է: Առարկան դասավանդվում է նաեւ ավագ դպրոցում, բակալավրիատում եւ մագիստրատուրայում»,- ասաց ռեկտորը: Նրա խոսքով, հետագայում դժվար կլինի ցածր տեղեր զբաղեցնելը, որովեհետւ տարիների ընթացքում եկել ու հասել են այս բարձր մակարդակին: «Շախմատային հաղթանակը մեծ նվաճում է նաեւ Հայաստանի համար»,- համոզված է Թոքմաջյանը:
Շախմատի մարզիչ Ռաֆայել Չատինյանն ասում է, որ մասնակիցները լավ են պատրաստված եղել մրցաշարին: Հոուսով է, որ իրենց թիմի հաջողությունները կրկնապատկվեն:
Նարե Առաքելյանը սովորում է ԵՃՇՊՀ-ի Տնտեսագիտության ֆակուլտետի առաջին կուրսում: Նա շախմատային մրցաշարում խաղացել է երրորդ տախտակի վրա: Սա հանրապետությունից դուրս տարած առաջին հաղթանակն էր: Մրցաշարի ընթացքում ունեցած ամենամեծ ձեռքբերումը համարում է հենց այս հաղթանակը:
Արամ ԱՐԱՐԱՏՅԱՆ
Կարդացեք նաև
