Աշխատանքի եւ սոցիալական հարցերի նախարար Արտեմ Ասատրյանը բյուջեի նախագծի քննարկման շրջանակներում այդպես էլ չբացատրեց ՀՅԴ պատգամավոր Արծվիկ Մինասյանին, թե ինչպես կարելի է «ներազդել» երիտասարդ ընտանիքների ամուսնական կառուցվածքի վրա: Հիշեցնենք, որ Արծվիկ Մինասյանը կարդացել էր 2013-ի բյուջեի նախագծում գրված մի զավեշտալի նախադասություն ու խնդրել բացատրել իրեն՝ ի՞նչ է նշանակում դա: Այն է՝ «Ժողովրդագրական քաղաքականության բնագավառում 2013-ի տարեկան ծրագրի շրջանակներում կիրականացվեն ժողովրդագրական իրավիճակի բարելավմանն ուղղված միջոցառումներ, ինչը նպատակաուղղված է երիտասարդ ընտանիքների ձեւավորման գործընթացների վրա նպատակային ներազդման միջոցով բնակչության ամուսնական կառուցվածքի աստիճանական բարելավման»:
Aravot.am-ը ՀՅԴ խմբակցության պատգամավոր Աղվան Վարդանյանին խնդրեց մեկնաբանել՝ որպես նախկին սոցապնախարար՝ ինչպե՞ս է հնարավոր ներազդել երիտասարդ ընտանիքների ամուսնական կառուցվածքին: Նա պատասխանեց. «Այդ հարցը տվեք Արծվիկ Մինասյանին, որովհետեւ նա է այդ հարցը բարձրացրել: Ես ձեզ դա խորհուրդ եմ տալիս՝ որպես ներկա պատգամավոր: Եվ ներազդելու բազմաթիվ ձեւեր կան»,- ասաց պատգամավորն ու սկսեց ծիծաղել:
Հռիփսիմե ՋԵԲԵՋՅԱՆ
