Սննդամթերքի անվտանգության պետական ծառայության պետի մամուլի խոսնակ Բաբկեն Պիպոյանից տեղեկացանք, որ Իջեւան քաղաքից 7 կմ հեռավորությամբ գտնվող սարամասում հոկտեմբերի 30-ին անկված կովից վերցված փորձանմուշների լաբորատոր ստուգումների արդյունքներով հաստատվել է, որ կենդանին սատկել է սիբիրախտից: Նույն տարածքում անկված գոմեշի մսեղիքի լաբորատոր ստուգումների արդյունքները հայտնի կլինեն նոյեմբերի 7-ին:
Իջեւան քաղաքի ծայրամասում տեղադրվել է հսկիչ կետ, ուր անասնաբույժները՝ ոստիկանության հետ համատեղ վերահսկում են անասունների եւ դրանց մսեղիքի տեղաշարժը: Պարոն Պիպոյանն ասաց, որ սատկած կովն ու գոմեշը սիբիրախտի դեմ պատվաստված չեն եղել:
Անասնաբուժական պետական տեսչության պետ Հովհաննես Մկրտչյանի հանձնարարականով ներկայումս Տավուշի մարզի համայնքներում կատարվում է անասունների վերահաշվարկ եւ ռեվակցինացիա: Ստուգումները ցույց են տալիս, որ շատ անասուններ դուրս են մնացել պետական պատվերով անասունների պարտադիր պատվաստման գործընթացից: Տեսչական ստուգումները կատարվում են փաստաթղթային ստուգումների եւ անասնատերերի շրջանում հարցման միջոցով: Բ. Պիպոնյանն ասաց, որ անասունների վերահաշվարկը եւ ռեվակցինացիան սննդամթերքի պետական տեսչության գործառույթը չէ, սակայն այժմ անհրաժեշտ է ծագած խնդիրները շուտափույթ լուծել:
«Մեղավոր որոնելուց եւ պատժելուց առաջ պետք է վտանգը արագ վերացնենք, հետո եզրակացություններ կանենք»,- ասաց սննդամթերքի անվտանգության պետական ծառայության պետի մամուլի խոսնակ Բաբկեն Պիպոյանը:
Կարդացեք նաև
Ոսկան ՍԱՐԳՍՅԱՆ
