Ավան և Նոր Նորք վարչական շրջանների դատարանում՝ դատավոր Արսեն Բաբայանի նախագահությամբ, այսօր ընթացավ ազգագրագետ Հրանուշ Խառատյանն ընդդեմ գործարար Ռուբեն Հայրապետյանի գործով դատավարությունը: Նա պահանջում է, որ պարոն Հայրապետյանը ներողություն խնդրի իր պատիվն, արժանապատվությունն ու գործարար համբավն արատավորելու համար:
Դատարանը ընդմիջում հայտարարեց՝ հայցվոր կողմի միջնորդության վերաբերյալ որոշում ընդունելու համար: Տիկին Խառատյանի ներկայացուցիչ Մհեր Արշակյանը միջնորդեց դատարանին պարզել, պարոն Հայրապետյանին ներկայացնող պաշտպաններին տրված լիազորագրի ստորագրության իսկությունը, արդյոք այն իսկապես պարոն Հայրապետյանի՞նն է: Ռ. Հայրապետյանի պաշտպան Կարեն Պետրոսյանը առարկեց այդ միջնորդությունը՝ պարզաբանելով, որ հայցվորը չի հիմնավորում իր կասկածները եւ պնդեց, որ իրենց տված լիազորագիրն իսկապես ստորագրել է պարոն Հայրապետյանը: Ըստ նրա հակառակ դեպքում, կստացվի իրենք փաստաթուղթը կեղծել են, ինչը կարող է պարզվել իրավասու մարմինների կողմից, բայց դատարանն այն տեղը չէ, որտեղ այդ հանգամանքը պետք է պարզվի:
Տիկին Խառատյանն էլ պնդեց իր պաշտպանի միջնորդությունը՝ բացատրելով, որ տագնապ ու լուրջ կասկածներ ունի, որ պարոն Հայրապետյանը հետագայում կարող է հրաժարվել, թե ինքն է ստորագրել:
Դատարանը որոշեց բավարարել ազգագրագետ Հրանուշ Խառատյանի պաշտպան Մհեր Արշակյանի միջնորդությունը: Հայրապետյանի պաշտպանները դատարան պետք է ներկայացնեն ստորագրության նոտարական վավերականությունը կամ պատասխանողը ՝ Ռուբեն Հայրապետյանը, անձամբ պետք է ներկայանա: Դատարանը որոշեց նախնական նիստը հետաձգել նոյեմբերի 22-ին :
Կարդացեք նաև
Արփինե ՍԻՄՈՆՅԱՆ
