«ՀԱԿ-ի մի քաղաքական գործիչը մի բան է ասում, մյուսը՝ այլ, հետո սկսում են իրար հերքել»,- այսօր «Հայելի» մամուլի ակումբում վերլուծելով ընդդիմադիր դաշտի վիճակը՝ ասաց ՀՀԿ խմբակցության քարտուղար Հովհաննես Սահակյանը, հավելելով, որ եթե ՀԱԿ-ում միասնական տեսակետներ լինեն տարբեր հարցերի շուրջ, ՀՀԿ-ի համար առավել դյուրին կլինի դրանք գնահատելը:
«Բարգավաճ Հայաստան» կուսակցության խորհրդավոր լռությանը եւս հանրապետական պատգամավորը չցանկացավ անդրադառնալ, քանի որ պաշտոնական հայտարարություններ եւ որոշումներ դեռեւս չեն հրապարակվել:
Խոսելով ընդդիմության՝ միասնական թեկնածուով հանդես գալու հեռանկարի մասին, նկատի ունենալով նաեւ «Ժառանգություն» կուսակցության առաջնորդ Րաֆֆի Հովհաննիսյանի եւ ԱԻՄ նախագահ Պարույր Հայրիկյանի հայտարարություններն էլ, հանրապետական պատգամավորն ասաց. «Ինչպես 6 ամիս առաջ ես կանխատեսել էի, հիմա կամաց-կամաց իրողություն է դառնում , որ միասնական թեկնածու չի կարող լինել»:
Առաջին նախագահի առաջադրման դեպքում նրա՝ միասնական թեկնածու լինելու մասով էլ նկատեց. «ՀԱԿ-ի ներսում միասնական թեկնածու չկա, մեկ ասում է Լեւոն Տեր-Պետրոսյանը կարող է լինել, մեկ՝ մյուսը կարող է լինել, է, էդպես ՀՀԿ-ն 90 հազար անդամ ունի եւ այդքան պոտենցիալ թեկնածու»:
Կարդացեք նաև
«Հայելի» մամուլի ակումբում անդրադառնալով ներքաղաքական ներկա իրավիճակին, ՀՀԿ խմբակցության քարտուղար Հովհաննես Սահակյանն ասաց, որ նախագահական ընտրություններից առաջ բնական ակտիվություն է նկատվում:
Նելլի ԳՐԻԳՈՐՅԱՆ
