Լուսանկարը` «Գալայի»
Այսօր բյուջեի նախագծի քննարկման ժամանակ ԱԺ-ում ՀԱԿ պատգամավոր Հրանտ Բագրատյանն ասաց, որ էներգետիկայի եւ բնական պաշարների նախարար Արմեն Մովսիսյանին իր անձի հետ կապված հարցեր ուներ, ինչո՞ւ չի եկել:Փոխնախարար Արա Սիմոնյանը տեղեկացրեց, որ նախարարը վատառողջ է:
ՀԱԿ պատգամավորը բարձրացրեց «Ատոմէներգասեյսմանախագիծ» ինստիտուտի հարցը: Բանն այն է, որ այդ ինստիտուտը անգնահատելի ծառայություններ է մատուցել ժամանակին մեր երկրին, սակայն ընդամենը տնօրենին փոխելով՝ հիմնարկը քարուքանդ եղավ ու սկսեց այլեւս չգործել: Հիմնադրման օրից ինստիտուտի տնօրենը Ֆրիդրիխ Առաքելյանն էր, հետո նրան փոխարինեց Հրահատ Հակոբյանը: Հրանտ Բագրատյանի ասելով՝ «նոր տնօրենը նախարարի բարեկամն է, ինչն է, մի քիչ կասկածներ ունեմ, որ շուտով այդ ինստիտուտի տեղը ռեստորան է այն դառնալու, լավ էլ տեղում է»:
Նոր տնօրենի նշանակումից հետո ինստիտուտի աշխատակից էներգետիկները հայտնվեցին հարկադիր պարապուրդի մեջ ու սկսեցին բողոքներ գրել նախարարին՝ անարձագանք: Այսօր փոխնախարարը պատասխանեց. «Երկու տարի առաջ կառավարության որոշմամբ՝ այդ ինստիտուտը վերամիավորման կարգով միացվել է էներգետիկայի գիտահետազոտական ինստիտուտին: Ցավոք, վերջին տարիներին այդ ինստիտուտը կորցրել էր եւ տեխնիկական կարողությունները եւ մասնագիտական»:
Հռիփսիմե ՋԵԲԵՋՅԱՆ
Կարդացեք նաև
