Հատվածներ ՀՀԿ խմբակցության անդամ Արտակ Դավթյանի հարցազրույցից:
– Ձեր կարծիքով՝ ինչքա՞ն է տևելու ԲՀԿ–ի դանայան տակառ լցնելու գործընթացը։
– Նկատի ունեք անորոշությո՞ւնը։ Ամեն նչ իր տրամաբանական ավարտին կհասնի նախագահական ընտրություններով։
– Չե՞ք կարծում, որ այս հապաղումներն ընտրազանգված կորցնելու վտանգ ունեն իրենց մեջ։
Կարդացեք նաև
– Դա, իհարկե, իրենց որոշելիքն է։ Անորոշությունն հրենց գործողությունների հետևանքն է. եթե անցած տարվա փետրվարին ստորագրված հուշագրին հավատարիմ են, տարաբնույթ մեկնաբանութտւնների տեղիք չպիտի տային ԲՀԿ-ականների շուրթերով։ Կուսակցությունից անկախ, նաև որոշակիորեն իրարամերժ տեսակետներ ներկայացնելով՝ տարբեր ԲՀԿ-ականներ խորացնում են խառնաշփոթ իրավիճակը, որը, այո, ընտրազանգվածը կորցնելու որոշակի վտանգ է պարունակում։
– Ներեք ոչ կուսակցականիս այս հարցը, ես, իրոք, չեմ հասկանում՝ կուսակցական կարգապահության և կուսակցական լայնախոհության սահմանները որո՞նք են։ Մի կողմից՝ որևէ կուսակցական անկախ անհատ չէ և ազատ չէ իր տեսակետներն արտահայտելու մեջ, մյուս կողմից՝ կուսակցություն չի նշանակում տարակարծության արգելք։ Սահմանագիծ կա՞։
– Ես կարծում եմ՝ յուրաքանչյուր քաղաքական գործիչ որոշակի ազատության սահմաններ, անկասկած, պիտի ունենա, բայց այդ սահմանները չպիտի հակադրվեն կուսակցության գրավոր խոսքին։ Այս դեպքում՝ հուշագիրը գործում է, և որևէ մեկը հուշագրից հրաժարվելու հայտարարություն չի արել։ Թեպետ, հուշագրի ոգուն դեմ արտահայտությունների պակաս չենք զգացել։ Այս գործելաոճն անհասկանալի է ինձ։
– Նույնքան և ավելի անհասկանալի կարող է լինել ընտրողին։
– Բացահայտորեն «Մեր խոսքը գործ է» կարգախոսը չի գործում։ Դա ևս իր բացասական ազդեցությունը կունենա՝ վստահության ու ընտրազանգվածի կորստի առումով։ Բայց այդ ճանապարհն իրենք են ընտրել ու անորոշությունն իրենք են ձևավորել։
– Իրո՞ք ԲՀԿ–ն իր փակուղային վիճակը պարտադրում է քաղաքական դաշտին, ինչպես գրում են վերլուծաբանները։
– Քաղաքական դաշտը պարտադրանք կամ հարկադրանք ընդհանրապես չի հանդուրժում։ Հայաստանի Հանրապետությունն էլ այդ տեսակետից բացառություն չէ։ ԲՀԿ-ն խորհրդարանական երկրորդ ուժը դարձավ՝ ընտրություններում բավականին բարձր արդյունքներ արձանագրելով։ Իրենք հետագա քայլերով կամրապնդե՞ն այդ արդյունքները, թե՞ վարկանիշի, ապագային միտված տեսլականի կորուստ կունենան, ժամանակը ցույց կտա։ ՀՀԿ-ն ու ԲՀԿ-ն, ամբողջ քաղաքական դաշտը կշահեն միայն, եթե այս երկու ուժերը գործեն համագործակցության դաշտում, միասնական պլատֆորմ ձևավորեն ընդհանրական տեսակետների հիման վրա։
– Ինչպե՞ս կզարգանան ՀԱԿ–ԲՀԿ հարաբերությունները, ՀԱԿ–ը կկտրի՞ պորտալարը ԲՀԿ–ից։
– 2008-ի և 2012-ի ՀԱԿ-ը քաղաքական տարբեր կշիռներ ունեցող միավորներ են։ Նրանք իրենց գործողությունների հետևանքով են բազմապատիկ կորուստներ ունեցել։ Մեկ հանդես են գալիս արմատական դիրքերից, մեկ իշխանության քաղաքականությունն են գովերգում, մեկ ռևերանսներ են անում ԲՀԿ-ին։ Եթե առաջիկայում ականատես լինենք բացահայտ սիրո խոստովանության մեկ այլ քաղաքական ուժի, չպիտի զարմանանք։ Դա բերում է ոչ միայն քաղաքական վարկանիշի կորստի, այլև ինքնաոչնչացման, ու կառույցի կազմալուծման ամենակարճ ճանապարհն է։ Խորհրդարանական ընտրություններից հետո մենք տեսանք այդ ճաքերը։ Եթե շարունակվի նման գործելաոճը, նախագահական ընտրություններից հետո կառույցն ընդհանրապես կփլուզվի։֊
– Լևոն Տեր–Պետրոսյանն իր թեկնածությունը կառաջադրի՞ նախագահական ընտրություններում։ Իր պատմական պրագմատիզմը նրան կմղի կառույցի կյանքը երկարացնելու կամ փրկելո՞ւ, թե՞ անձնական քաղաքական ճակատագրի մասին կմտածի, երկրորդ պարտությունն առանձնապես մեծ հաճույք չէ։
– Դժվարանում եմ ասել, թե որը կընտրի, ուղղակի քիչ ժամանակ է մնացել։ ՀԱԿ-ի ղեկավարի գործունեության մեջ գերակշռում են կոնյունկտուրային քայլերը՝ մե՛կ իշխանությանը քննադատելը, մե՛կ սիրաշահելը, մե՛կ ԲՀԿ-ի նկատմամբ անվերապահ սերը, մե՛կ «Ժառանգության» նկատմամբ ռևերանսները, նախորդ նախագահական ընտրություններից առաջ էլ սիրախաղ էր ՕԵԿ-ի հետ, որին հետո ամենակոշտ քաղաքական գնահատականները տրվեցին։
– Դա քաղաքական ճկունության դրսևորում չէ՞։
– Ոչ, դա քաղաքական խաբկանք է, ի վերջո յուրաքանչյուր քաղաքացի հասկանում է, թե դա ինչ է նշանակում՝ կոնյունկտուրայից ելնելով կարևորը զոհաբերվում է երկրորդականին։
– Երկրորդ նախագահը ռեալ փորձ կանի՞ ակտիվ քաղաքականություն վերադառնալու։
– Երկրորդ նախագահն այնքան խոհեմ, փորձառու քաղաքական ու պետական գործիչ է, որ առաջիկա նախագահական ընտրություններում մենք մասնակցային առումով ակտիվ քաղաքականություն նրա վերադարձին ականատես չենք լինի։
Անահիտ ԱԴԱՄՅԱՆ
«Իրատես de facto»
