ԱԺ ՕԵԿ խմբակցության պատգամավոր Հովհաննես Մարգարյանը, անդրադառնալով ՀԱԿ խմբակցության քարտուղար Արամ Մանուկյանի երեկվա հայտարարությանը, որ պատրաստ են համագործակցել բոլոր քաղաքական ուժերի հետ, բացի ՕԵԿ-ից՝ հակադարձեց՝ ՕԵԿ-ն ուր, Արամ Մանուկյանն՝ ուր: «Չէի ուզենա մեկնաբանել, այդ գործիչը չարությամբ կուրացած է եւ սրտաճմլիկ ձեւով փորձում է մեկ հանրապետականների մեկ ԲՀԿ -ականների հետ համագործակցել: Խոսքը ոչ թե ՀԱԿ-ի այլ կոնկրետ Արամ Մանուկյանի մասին է: Ով է նա ընդհանուր առմամբ, ինձ համար դժվար է ասել, ուղղակի կենսագրության մեջ մի դրվագ կա, որ անկախության հռչակագիրն է կարդացել: Ես միայն դա գիտեմ, բայց դա բավարար պայման չէ, որ այդքան ուշադրություն դարձնենք նրա հայտարարությունների վրա: Ինքը ուր, ՕԵԿ –ը՝ ուր, արդյոք ՕԵԿ-ը կուզենար համագործակցել նրա հետ»,- այսօր «Պոստ սկրիպտում» ակումբում ասուլիսի ժամանակ ասաց պարոն Մարգարյանը:
Նա նաեւ հավելեց, որ իրենց կուսակցության մասին բոլոր խոսակցությունները պայմանավորված են նրանով, որ իրենք նոր թափ են առնում. «Ո՞մ մասին չեն խոսում , այսօրվա դրությամբ քաղաքական դաշտում դերակատարում չունեցող ուժ լինես եւ ժողովուրդը մշտական վստահության քվե չտա, ոչ մեկ քո մասին չի խոսի, ում դարդն է կտրվել , որ խոսի: Այնքան համարձակություն ունեցանք, որ այս պայմաններում վերակազմավորվեցինք ու այս պահի դրությամբ 10.000 անդամ ունենք նոր չափորոշիչներով անդամագրվել ենք»: Նրա խոսքերով, հիմա ՕԵԿ-ին անդամագրվելու ցանկություն հայտնողները պետք է 2 ամիս փորձաշրջան անցնեն ու պարտադիր բերեն ՕԵԿ վարչությունից կամ տարածքային գրասենյակների ղեկավարներից գոնե երկու երաշխավորագիր:
Նա կրկին հիշեցրեց, որ բարձր կալիբրի պաշտոնյաներ են անդամագրվում, իսկ անուններ նա կներկայացնի հաջորդ անգամ:
Արփինե ՍԻՄՈՆՅԱՆ
