«Բարգավաճ Հայաստան» եւ Հայ ազգային կոնգրես խմբակցությունների համագործակցությունը նկատելի է այնքանով, որքանով մենք աշխատում ենք մի հիմնարկում եւ այնքանով, որքանով որ դրսեւորվել է խորհրդարանում: Այս մասինNEWS.am-ի թղթակցի հետ զրույցում ասաց «Բարգավաճ Հայաստան» խմբակցության մամուլի քարտուղար, ԱԺ պատգամավոր Տիգրան Ուրիխանյանը:
Հարցին, թե համագործակցությունը շարունակվո՞ւմ է մինչ այժմ, նա պատասխանեց. «Մենք դեռ աշխատում ենք խորհրդարանում: Եւ ԲՀԿ, եւ ՀԱԿ խմբակցությունները, ինչպես նաեւ ՀՅԴ, ՀՀԿ, «Ժառանգություն» խմբակցությունները խորհրդարանում են աշխատում` մեկ հիմնարկում»:
Ինչ վերաբերում նախագահական ընտրությունների հետ կապված ՀԱԿ-ի եւ ԲՀԿ-ի համագործակցությանը, ապա նա նշեց, որ որեւէ պատասխան չի հնչեցնի, որովհետեւ կաշկանդված է խոսնակի պարտականություններով եւ խնդրեց սպասել իրենց պաշտոնական դիրքորոշմանը ` դրանից բխող հետեւանքներով եւ բոլոր ածանցյալ եւ օժանդակ հարցերով:
Նշենք, որ ՀԱԿ խմբակցության քարտուղար Արամ Մանուկյանը երեկ վերահաստատեց իր ավելի վաղ հայտնած տեղեկությունը, որ ԲՀԿ-ի հետ համագործակցության որոշում է ընդունվել դեռ օգոստոսին: Նա նաեւ հավելեց, որ որոշումը կոնսենսուսով է ընդունվել եւ ՀԱԿ-ի մաս կազմող այն ուժերը, որոնք ներկա են եղել քննարկմանը, կողմ են եղել:
