Երեկ, երբ Հայ ազգային կոնգրեսի համակարգող, ԱԺ ՀԱԿ խմբակցության ղեկավար Լեւոն Զուրաբյանին հարցրինք, թե ինչպես է Կոնգրեսը վերաբերվում «Ժառանգության» առաջնորդի կոչին, Հովհաննիսյանի շուրջ որեւէ կոնսոլիդացիա հնարավո՞ր է, նա պատասխանեց. «Կարծում եմ, որեւէ քաղաքական գործիչ եթե ներկայացնում է միասնականությունը ապահովելու հայտ, նրա այդ հավակնությունը պետք է հիմնավորված լինի կոնկրետ գործերով։ Ընդհանրապես, միասնական թեկնածու կարող է լինել այն քաղաքական գործիչը, որի շուրջ կատարվում է քաղաքական ուժերի համախմբում, եւ որպես առաջին քայլ, եթե «Ժառանգության» ղեկավարը ներկայացնում է նման հավակնություն, կարծում եմ, ճիշտ կլիներ ապահովել միասնականությունն իր հենց ղեկավարած քաղաքական ուժի խմբակցությունում։ Նման դեպքում ավելի հիմնավորված կլիներ նրա ներկայացրած հայտը»։
Իսկ ձեր կարծիքով, որեւէ այլ քաղաքական ուժ կհամախմբվի՞ «Ժառանգության» առաջնորդի շուրջ՝ մեր այս հարցին Լեւոն Զուրաբյանը պատասխանեց. «Բացարձակապես ցանկություն չունեմ նման մտավարժանքների մեջ մտնելու»։ Երբ ասացինք, որ այս ընթացքում մի քանի քաղաքական ուժեր նշել են միասնական թեկնածուի շուրջ կուլիսներում ընթացող բանակցությունների մասին, Զուրաբյանն ասաց. «Ինձ կոնկրետ ձեր նշած թեկնածուի շուրջ որեւէ բանակցությունների մասին ոչինչ հայտնի չէ»։
Լուսինե ԲԱՐՍԵՂՅԱՆ
«Հայկական ժամանակ»
