«Ազատ դեմոկրատներ» կուսակցության փոխնախագահ Անուշ Սեդրակյանին «Առավոտ»-ը այսօր հարցրեց թե ինչպե՞ս է վերաբերվում ՀԱԿ խմբակցության պատգամավոր Արամ Մանուկյանի հայտարարություններին, որոնք առնչվում էին ԲՀԿ-ի հետ համագործակցությանը եւ 2008թ․ մարտի 1-ի կազմակերպման մեղավորներին հարցին:
«Այդ հայտարարությունը ինքնին բավականաչափ պերճախոս է: Կարծում եմ, քաղաքական ուժը ոչ թե պետք է մեկնաբանի այլ քաղաքական գործչի հայտարարությունը, այլ պետք է ընդհանրապես սահմանենք քաղաքական կոռեկտության եւ քաղաքական էսթետիկայի որոշակի չափանիշներ, որոնցից շեղվելը արդեն կդատապարտվի հանրության կողմից: Վերջիվերջո մենք փորձ ենք անում նսեմացնել մարտի 1-ի զոհերի հիշատակը, որը ենթակա չէ նսեմացման եւ քաղաքական որեւէ շահարկման: Այս պարագայում իբրեւ քաղաքական ուժի ներկայացուցիչ կարող եմ միայն մի բան ասել՝ քաղաքական գործիչների եւ քաղաքական ուժի համար կարեւորը քաղաքական վստահության կրեդիտը չկորցնելն է։ Նման հայտարարությունները կարող են մեծապես սասանել քաղաքական վստահության կրեդիտը։ Նման հայտարարությունների հետ պետք է շատ զգույշ լինել, եթե անգամ այդ հայտարարությունները հեռահար նպատակ ունեն՝ զատել ԲՀԿ-ն Ռոբերտ Քոչարյանի կերպարից, ինչը նույնպես քաղաքականապես այնքան էլ հեռատես քայլ չէ»,- նկատեց Անուշ Սեդրակյանը:
Մանրամասները կարող եք կարդալ վաղվա տպագիր «Առավոտ»-ում:
Էմմա ԳԱԲՐԻԵԼՅԱՆ
