Այսօր «Գործընկերություն հանուն բաց հասարակության» նախաձեռնության կողմից կազմակերպված «Քաղաքացիական հասարակության զարգացման հիմնախնդիրները եւ մարտահրավերները» հանրային քննարկման ժամանակ Հայաստանի Հելսինկյան կոմիտեի նախագահ Ավետիք Իշխանյանը Aravot.am-ի հետ զրույցում ասաց, որ բացի վերոնշյալից, քննարկվելու է նաեւ Հայաստանի Հանրապետությունում քաղաքացիական հասարակության կազմակերպությունների զարգացման ռազմավարության հայեցակարգը, որը բացի իրավիճակի վերլուծությունից, որտեղ կարելի է շատ հարցերի հետ համաձայնել, որոշների շուրջ բանավիճել, կան հայեցակարգային հարցեր, ապագային միտված, որոնք շատ վիճահարույց են եւ վտանգավոր:
Իշխանյանը մասնավորապես նշեց. «Դրանցից է հետեւյալը, պետության եւ քաղաքացիական հասարակությունների փոխհարաբերությունների նախընտրելի տարբերակը. համագործակցությունը, փոխադարձ վերահսկողությունները, փոխներթափանցությունը եւ հասարակական կազմակերպությունները ընդգրկվում են պետական իշխանության տարբեր օղակներում, իսկ պետական իշխանության ներկայացուցիչները մասնակցում են քաղաքացիական կազմակերպությունների գործունեությանը: Սա բավականին անհասկանալի դրույթ է եւ կարող է միտված լինել նրան, որ ինչպես խորհրդային համակարգում էր՝ հասարակական կազմակերպությունները դառնան պետական կցորդներ: Կարծես թե տպավորությունն այնպիսին է, որ այս հայեցակարգը ոչ թե քաղաքացիական հասարակության զարգացմանն է միտված, այլ՝ ինչպես կար խորհրդային հասարակարգ, ոչ թե քաղաքացիական հասարակություն, այնպես էլ, արդի Հայաստանի Հանրապետությունը, իր ժողովրդավարությամբ, իր իրավիճակով, այդ տիպի հասարակության ստեղծմանը»:
Եվա ՀԱԿՈԲՅԱՆ
