Օրեր առաջ ՀՀ վարչապետ Տիգրան Սարգսյանի գլխավորությամբ կառավարությունում տեղի ունեցած կոռուպցիայի դեմ պայքարի խորհրդի նիստը բոյկոտեցին ՀԱԿ և ԲՀԿ կուսակցությունները: Aravot.am-ը ԲՀԿ խմբակցության քարտուղար Նաիրա Զոհրաբյանի հետ զրույցում հետաքրքրվեց՝ հաշվի առնելով խորհրդի նիստի ընթացքն ու արդյունքներն արդյոք իրենք չե՞ն զղջում, որ չեն մասնակցել նիստին, թե՞ շարունակում են մնալ նույն դիրքորոշմանը:
Տիկին Զոհրաբյանն ասաց. «Նիստի ընթացքը մեզ հերթական անգամ համոզեց, որ մենք ճիշտ որոշում էինք կայացրել: Որևէ վերապահում չունենալով կոռուպցիայի դեմ պայքարի թեմայով դասախոսություններ կարդացողների հանդեպ` գտնում ենք, որ պետք է ձեռնարկել կոնկրետ քայլեր: Մենք առաջարկել էինք կոնկրետ քայլ, մեր առաջարկը չի ընդունվել: Ավելին, մեզ ուղարկվել է այդ խորհրդի կանոնադրությունը` մի երկար պատմություն, որից հետևում է, որ մենք չենք կարող կոնկրետ առաջարկություններ ներկայացնել: Եթե խորհուրդը կվերանայի իր որոշումը և հաշվի կառնի խորհրդին ներկայացված քաղաքական ուժերի առաջարկները, մենք կքննարկենք մեր մասնակցության հարցը: Առաջին նիստից հետո կրկին համոզվեցինք, որ ճիշտ էր եղել մեր որոշումը՝ չմասնակցել այս խորհրդի նիստերին»:
ՀԱԿ խմբակցության պատգամավոր Հրանտ Բագրատյանից էլ հետաքրքրվեցինք՝ կոռուպցիայի դեմ պայքարի խորհրդի նիստի արդյունքներից ելնելով՝ ՀԱԿ-ը մնացել է նույն կարծիքի՞ն՝ չմասնակցել նիստերին, թե՞ փոխել է կարծիքը: Պարոն Բագրատյանը պատասխանեց. «Վարչապետը ձեռ է առնում: Կոռուպցիայի դեմ պայքարող վարչապետը ավելացնում է սուբսիդիաները բյուջեում և մատակարարներին է բաժանում, այլ ոչ թե սպառողներին: Հարց ես տալիս համապատասխան նախարարին, ինչո՞ւ փողը գյուղացուն չեն տալիս, ասում է՝ կտանի փողն ուրիշ տեղ կծախսի: Հարց ենք տալիս՝ երբ փողը մատակարարին ես տալիս, կամ գյուղացուն, որտե՞ղ է կոռուպցիան մեծ: Ասում է՝ առաջին դեպքում: Այդ դեպքում առաջինն ինչո՞ւ եք խրախուսում: Ծիծաղելի է, մարդու սիրտն արդեն չի դիմանում, վարչապետը ձեռ է առնում բոլորին»:
Կարդացեք նաև
Հարցին՝ արդյո՞ք նիստի ընթացքին հետևելով նշված խնդիրների լուծման առումով կոնկրետ մտադրվածություն նկատվեց, պարոն Բագրատյանը պատասխանեց. «Ոչ մի բան, ձևական ստից բաներ, այնինչ կոռուպցիան մեզ համար ֆունդամենտալ կառուցվածքային երևույթ է»:
Տաթև ՀԱՐՈՒԹՅՈՒՆՅԱՆ
