Հայաստանի գրողների միության Տավուշի մարզային բաժանմունքի ղեկավար, Նոյեմբերյանի սոցիալական ծառայության պետ Սամվել Բեգլարյանն ասաց, որ բազմաթիվ մարդիկ զանգահարում են եւ հարցնում, թե ի՞նքն է գնել «Հանթսման» ընկերությանը պատկանող հայաստանյան ձեռնարկությունը:
Նոյեմբերի 1-ին, ժամը 23.30-ին Հանրային հեռուստաընկերության «Հարցազրույց» հաղորդման ժամանակ Հայաստանի ազգային անվտանգության ծառայության քննչական վարչության պետի տեղակալ, Վարդան Օսկանյանի գործով քննչական խմբի ղեկավար Միքայել Համբարձումյանն ասել է, որ Հայաստանի անվտանգության ծառայությունը տեղեկություններ է ստացել, որ բարերար Ջոն Հանթսմանի ցանկությամբ , վերջինիս պատկանող «Հանթսման Բիլդինգ Փրոդաքթս» ՍՊ ընկերությունը 2010թ. հոկտեմբերի –դեկտեմբեր ամիսներին 2 միլիոն 100 հազար դոլարով վաճառվել է ՀՀ քաղաքացի Սամվել Բեգլարյանին, այդ վաճառքից առաջացած գումարը նախատեսված էր բարեգործության համար:
«Որտեղի՞ց ինձ 2 միլիոն դոլար»,-ասում է նոյեմբերյանցի գրողը, ում «Կիրակի» պատմվածքը վերջերս «Ապոլոն» հրատարակչության կողմից ,«Արդի հայ պատմվածք» մատենաշարով, անգլերեն է հրատարակվել: Հարց չէր ծագի, եթե Միքայել Համբարձումյանը Նվեր Մնացականյանին տված հարցազրույցում նշեր, որ գնորդ Սամվել Բեգլարյանը «Շեն» կոնցեռնի սեփականատերն է, կամ եթե նրան նաեւ հայրանունով ներկայացներ: Հայաստանում քանի՞ մարդ կա Սամվել Բեգլարյան անուն-ազգանունով:
Ոսկան ՍԱՐԳՍՅԱՆ
Կարդացեք նաև
