Մեր երկրում սոցիալական բարեփոխումները հաջողություն չեն ունենա, եթե սոցիալական աշխատողի ինստիտուտը չզարգանա: Այսօր Մոսկվայի տանը տեղի ունեցած համաժողովի ժամանակ նման կարծիք հայտնեց ՀՕՖ-ի «Երեխաների աջակցության կենտրոն» հիմնադրամի գործադիր տնօրեն Միրա Անտոնյանը:
Տիկին Անտոնյանը սոցիալական ոլորտի պատասխանատուներին հորդորեց պետական աջակցություն ցուցաբերել սոցիալական աշխատողին, որպեսզի նա օրենքով պաշտպանված լինի:
Կարդացեք նաև
Համաժողովին ներկա աշխատանքի եւ սոցիալական հարցերի նախարար Արտեմ Ասատրյանին եւ ԱԺ սոցիալական հարցերի հանձնաժողովի նախագահ Հակոբ Հակոբյանին էլ կոչ արեց նվազագույն չափանիշներ սահմանել, որոնք կհստակեցնեն, թե ով եւ ինչպես կարող է գրագետ աշխատել մարդկանց հետ:
Սոցիալական ծառայությունը ընտանիքներին մոտեցնելու նպատակն այն է, որպեսզի կարիքավոր մարդիկ չհայտնվեն խնամքի հաստատություններում եւ աջակցություն ստանան հենց իրենց տանը: Այսինքն, ըստ տիկին Անտոնյանի, սոցաշխատողը պետք է հայտնաբերի վատ իրավիճակում հայտնված մարդուն, պարզի այդ պայմաններում հայտնվելու սկզբնապատճառը, որպեսզի կարողանան նրա խնդիրներին լուծում տալ: Խնամքի հաստատությունում գտնվող 126 երեխա սոցաշխատողների աջակցությամբ արդեն վերադարձել է ընտանիք:
Ներկայումս մեր երկրում գործում է սոցիալական ծառայություն մատուցող 35 ընկերություն, սակայն, ըստ տիկին Անտոնյանի, մարդիկ շատ հաճախ չգիտեն, որ նման ծառայություններ կան: Այսօր նույն վայրում կազմակերպվել էր նաեւ սոցիալական ծառայությունների ցուցահանդես:
ԵՊՀ-ում սոցիալական աշխատանք կրթական ծրագիր է գործում, որտեղ մասնագիտանում են սոցիալական աշխատողներ: Սակայն պրակտիկ դաշտում նրանք չեն կարողանում լիարժեք գործել` անհրաժեշտ չափանիշների բացակայության պատճառով:
Լուսինե ԲՈՒԴԱՂՅԱՆ
