Նոյեմբերի 2-ին Տավուշի մարզի սահմանամերձ Կողբ գյուղից 10 կմ հեռավորության վրա գտնվող անտառի ուսուցման «Զիկատար» կենտրոն էին ժամանել հանրապետական 13 թերթերի եւ լրատվական կայքերի լրագրողներ: Նրանք այստեղ մասնակցեցին համայնքային անտառկառավարման վերաբերյալ քննարկման: Նոյեմբերի 3-ին լրագրողները, ԵՊՀ Իջեւանի մասնաճյուղի բնապահպանական բաժնի ուսանողներ,Կողբի գյուղի բնակիչներ, Կողբի գեղարվեստի դպրոցի սաները,«Զիկատար», ուսումնական կենտրոնի աշխատակիցները Կողբի գերեզմանատնից վերեւ գտնվող տարածքում մասնակցեցին ծառատունկի, հիմնվեց համայնքային անտառ: Ծառատունկ կատարելու համար տարածքը մաքրվել է կենցաղային աղբակույտից, տնկվեցին հիմալայան մայրու տնկիներ:
«Զիկատար» կենտրոնի տնօրեն Անդրանիկ Ղուլիջանյանն ասաց, որ Տավուշի մարզի Կողբ եւ Ջուջեւան համայնքներում անցյալ տարի տնկվել է 28 հեկտար համայնքային անտառ, այս տարի՝ 16 հա : Ծրագիրն իրականացվում է Կովկասի բնապահպանական տարածաշրջանային կենտրոնի հայաստանյան մասնաճյուղի կողմից իրականացվող «Համայնքային անտառկառավարում» ծրագրի շրջանակներում: Համայնքների վարչական սահմաններում նոր անտառների հիմնումը նաեւ կենասաբազմազանության ապահովման խնդիր է լուծում, տնկվում են արժեքավոր ծառատեսակներ՝ հիմալայան մայրի, հունական ընկուզենի, արջատխլենի, հացենի, լորենի, ձիակասկ եւ այլն:
Ոսկան ՍԱՐԳՍՅԱՆ
