Այսօր «Երկու երես» ակումբում Հրանտ Դինքի գործով վարած Թուրքիայի քաղաքականությունից խոսեց «Ակոս» թերթի նախկին աշխատակից, Հրանտ Դինքի ընկեր Տիրան Լոքմագյոզյանը:
«Հիմնադրման օրից ի վեր Թուրքիան երկու կերպ է ներկայանում` խորքային մի կառույցով եւ այն, ինչ մենք ենք այժմ տեսնում: Շատերը գիտեն, որ այդ պետությունը կառավարվում է ոչ թե իրական առաջնորդների, այլ այն կառույցի կողմից, որը տարիներ շարունակ խորքային կառավարում է իրականացնում եւ հանցավոր գործողություններ կատարում; Դրանք անպատիժ են մնում, որովհետեւ կառույցը մտել է բոլոր ուժային մարմինների մեջ եւ դատավարություններ է անցկացնում մի շարք մարդկանց դեմ»,- ասաց Լոքմագյոզյանը` հավելելով, որ ոչ լեգալ կառույցի գործունեությունը չի կարելի միանշանակ ազգայնական համարել:
Բանախոսը հայտնեց, որ մինչ Հրանտ Դինքի մահը սպանության մասնակիցների կողմից նշվել էր, որ սպանությունը դեռեւս 2005թ-ին պետք է կատարվեր. «Ծրագիրն այլ խնդիր է, իրականացումը` այլ: Հավանական է, որ ինչ-որ մարդիկ նախապես էին մտածել վերացնել Դինքին, բայց հաշվի առնենք, որ նրա պես հանրաճանաչ դարձած մարդուն սպանելը այնքան էլ հեշտ գործ չէ: Ցավալի է, որ մինչ սպանությունը մենք չէինք ճանաչում Դինքին, մինչդեռ թուրքերին նա բավական հայտնի էր»:
Կարդացեք նաև
Լոքմագյոզյանի խոսքով` Թուրքիայում նմանատիպ գործերի դատավարությունները որոշակիորեն քաղաքականացված են. «Այն հանգամանքը, որ Դինքի սպանության իրական կազմակերպիչները եւ պատվիրատուները չեն բացահայտվել, ցույց է տալիս, որ դատարանն այնքան էլ ազատ չէ իր գործունեության մեջ: Զավեշտ էր հատկապես այն, որ որոշում կայացնելուց հետո դատավորն ասաց, որ այն չի բավարարում նույնիսկ իրեն»:
Լուիզա ՍՈՒՔԻԱՍՅԱՆ
